Tukin zing khan Mizoram Pradesh Congress Committee (MPCC) Campaign Committee ruahmannain, Congress Ṭhalai Hqrs chuan Aizawl Tennis Court kiangah ‘Ṭhat loh theih lohna Sawrkar ṭha, kalphung dik nei tura beihpui thlakna Street Campaign 2023’ bul ṭanna a nei a.
‘Street Campaign 2023’-ah hian MPCC Treasurer Dr. Lalmalsawma Nghaka, Vanlalawmpuii Chawngthu, Ex-Minister & President Mizoram Pradesh Mahila Congress Committee leh Rosiamngheta, AMC Corporator & Secretary MPCC ten thu an sawi.
“Congress Party hian Ṭang Puihna ‘policy’ hmangin mellung thar kan nei dawn a, ‘kan ti ang’ kan tih chu ti hlawhtling ṭhin kan ni,” MPCC Treasurer chuan a ti a. Dikna leh rinawmna hmanga kan ram tungding leh turin Congress Party chuan kum 2023 Inthlanpuiah hnehna an chan ngei tur thu a sawi a.
Dr. Lalmalsawma chuan, remna leh muanna a thlen theih nana Chief Minister nihna kiantu Party chu Mizo mipuite tâna ding tlat a ni ṭhin, a ti bawk a.
Mahila President Vanlalawmpuii Chawngthu chuan Congress Party chu hmeichhiate dinhmun chawisanna kawngah sulsutu a nih ṭhin thu a sawi a. Ex-Minister chuan hmeichhiate dikna chanvo ngaihthah lotu leh humhalhtu Party chu Mizo hmeichhiaten chawisang let ve turin a chah a ni. Ṭang Puihna hmanga mipui puih turte chu a taka a thlen leh dawn avangin he ‘policy’ hi belchiang turin a chah a ni.
AMC Corporator leh MPCC Secretary Rosiamngheta pawhin thusawiin, ‘politics’-ah chanchin hmasa zirchian a ṭul hle tih a sawi a. Party dang lo sutkuak tawhte leh kan ram tana nasa taka an lo thawhte sawichhiaa lal ṭhutthleng luah tum chu a malsawm ngai lo, a ti.
Congress-in hmasawnna tam tak an lo thlen tawha a aia nasa zawk thlena rorelna dik thlen leh turin kum 2023-ah, thlang leh ṭheuh turin a chah a. Kuthnathawktu mai ni lovin, an thawhchhuah leitu mipuite thlengin Ṭang Puihna hmanga dawm kan an tum tih a sawi bawk.
