Vawiin January ni 10, 2023 hian Mamit District Kawrthah khuaa Synthetic Turf Football Ground, TATA Trusts Grassroots Football Academy leh Tuidam khuaa Laldenga Synthetic Turf Football Ground chu Mizoram Chief Minister, Pu Zoramthanga’n a hawng.
Khuallian CM Zoramthanga chuan, ṭhalaiten taksa min tichhe thei ruihhlo, zuk leh hmuam lakah indo kan puan a ngai a. Kan ṭhalai tam tam tak a eichhe mek a, heng lakah hian indo kan puan a ṭul takzet a ni. CM bial pawhin kan la neih loh leh kan awh em em khelmual ṭha Kawrthah leh Tuidam khuaten in nei hi in bialtu MLA leh mipuite ka lawmpui takzet che u a ni. TATA Trusts Academy kan neih theih nan sorkar pawhin do letna pawh kan lo ṭang ve ange kan ti a. Hetiang Academy kan nei thei hi a lawmawm hle a ni.
Pu Zoramthanga chuan, Hnam movement harsa tak Pu Laldenga khan a kalpui a. Mizo ten hnam thinlung kan put chhung chuan Pu Denga hming hi a reh lo ang. Tuidam a Pu Laldenga Football Ground hming phuah hi a phu a, nakin zelah pawh a hmingpu hi thildang dang ala awm zel ang.Hnam pa a ni a, a phu a ni. Vawiin ah Pu Denga nupui, Pi Lalbiakdiki leh a fanu an lo tel thei hi a lawmawmin min ti phur lehzual hle a ni, a ti.
Khualzahawm Sports Minister, Pu Robert Romawia Royte chuan, heng kan khelmualte hi a tam thei ang berin hmang ṭangkai se. Tualchhung leh a chhehvel khaw hrang hranga infiam mite leh school hrang hrangin games neih nante ṭangkai taka hmang tura a duh thu a sawi bawk. TATA Trusts Grassroots Football Academy, Mizoram hmun 60 din zingah Kawrthah centre kan nei thei chu a lawmawm a, kan vannei hle a ni, a ti. Heng khelmual ṭha kan neih theih nana hmalatu leh hmanrua chu Pu Zoramthanga a ni.
Heng khelmualte hi a hman dan leh enkawl dan turte ngaihtuahtu tur committee te din a ni dawn a. Ṭangkai takin khaw hrang hrangin kan hman ngei ka beisei a ni. Phullem phah hi lo ning deuh te pawh a awm theih awm e, mahse, kan awmna party a zirin ninawm kan lo ti deuh pawh a ni maithei a ni. Thil ṭha kan neih hi thiam takin i hmang ṭangkai ang u. Zirna leh fitness hi India sorkarin a ngai pawimawh em em tawh a, hetianga fitness leh zirna inkawp tur hmunhma, khawthlangin hmasawnna kan nei hi a lawmawm hle a ni, a ti.
Vawiina Kawrthah leh Tuidam khelmual hawnnaah hian MLA kal zawng zawngte aiawhin, Pu Lalrintluanga Sailo, MLA, Govt.Dy.Chief Whip chuan thusawiin, hmasawnna hrang hrang kan nei leh oppostion bialah hetianga development beihpui thlak kan hre ngai lo a. Lawmthu i sawi ang u, ṭawngka mai nilo, kumin kum tawpah lawmthusawina kan neih ngei ka beiseiin ka sawm che u a ni tiin mipuite a sawm bawk.
