MPCC chuan thuchhuah siamin, “Ni 21 March, 2022 (Thawhṭanni) MNF Hnam Run chhung inkhawmah Pu Robert Romawia Royte chuan thusawiin ‘Hripui leng karah Pu Zoramthanga sawrkar kaihhruaiah hmasawnna a chawlh loh thu leh sawrkar leiba te a pung ti a sawi ṭhin chu thudik lo niin MNF sawrkarah leiba a pung lo tih hi Mizoram mipui hian hria se ka duh’ tiin a sawi a. Pu Robert Romawia Royte hian ‘CONGRESS in NLUP a kalpui chhung khan kawngpui khap khat pawh an siam lo’ tiin a sawi bawk. Congress party chuan hetiang dawt chiang lutuk kan ramhruaituin mipuite a hrilh duh hi vanduaithlak a ti hle a, a dik lohzia finfiah leh mai theih Minister ve meuhin an party mipui kalkhawm hmaa a sawi hrehlo hi zahthlak a ti takzet a, an party mipui a ngaihmawlzia a lantirnaah kan ngai a ni.
“Pu Zoramthanga sawrkarah hripui leng chung pawh a hnathawh a chawl lo a tih chu thubelhchian dawl lo a ni a. PAHOSS a Party mite duhsak nan a cheng nuai 100 chuang chuang a thlawn a mipui sum a sem ral te, SEDP Board enkawl nan a ṭul lo tak a sum a kalral tir chur chur te, sawrkar hnathawk hlawh a hun tak a pek theih loh te leh kum khat chuang Health Care bill a bat sak te bak sawrkarin hmalakna liantham a nei lo niin Congress party chuan a ngai a.
Kawngpui siam chungchangah pawh fur ruahtur tlak nasat lutuk vanga kawngpui siam that hman loh a nih avangin kum 2018 a MNF sawrkar thar kha Congress sawrkar khan cheng nuai 8900 lai a hnutchhiah a. Kan pawisa hnutchhiah hmanga kum 2019 chhunga MNF sawrkarin kawngpui a thawm that (repair) bak kha tun thlengin State Fund atangin hmalakna lian tham a awm lo va, Kum 2019 a an kawngpui thawmthat (repair) ho pawh a chhe leh deuh vek tawh zawk a ni, tih Minister hian lo hria se a duhawm hle.
“Mizoram leiba chungchang Minister Pu Robert Romawia Royte thusawi chu a ṭawngvai nge, Budget bu a bih miah lo tih Congress party chuan a zawt let a, Budget bu lo bih chiang tawh turin leh a thulakna RBI data te chu en mil turin a ngen nghal bawk. Kum 2008-2018 chhung Congress sawrkarah khan Mizoram leiba hi a pun chang leh a tlak hniam chang a awm a, Gross State Domestic Product (GSDP) nen a khaikhin phei chuan MNF sawrkar hmasa an tlak kum 2008 a Mizoram leiba chu GSDP atanga chhutin 103.5% lai a ni a, chu chu kum 2018-ah meuh chuan Congress sawrkar khan 38.9% ah a ti tlahniam hial a ni. MNF kum li awrh an sawrkar chhung hian leiba a pung nasa em em a Vbc 5,238 laiin a pung hman a ni tih hi Minister Pu Robert Romawia Royte hian lo hria se kan duh a. ‘MNF sawrkar hian nasa takin Mizoram leiba a ti pung a ni’ tih ‘thudik’ hi a sawi ngam lo a nih pawhin ngawi mai mai turin Congress party chuan Pu Robert Romawia Royte a chah a ni,” tiin an tarlang.
