MNF Party General Secretary VL Krosshnehzova chuan vawiin khan Aizawl Press Club-ah chanchinthar lakhawmtute kawmin, “ZPM hi kalphung hluia kalte aiin an buai zawk a, an kalphung thar hi kalphung hlui aiin a chhe zawk. August ni 11, 2023 khan ZPM chhuanvawr Dr Vanlalthlana MLA chuan, ‘Corruption do turin kan inpeih tawh a, a ngaihna pawh hre turah kan inngai,’ tiin ZPM office-ah a sawi a. Hetianga huai taka a sawi mek lai hian Dr Vanlalthlana hian a MLA fund a hman danah hian eirukna leh hlemhletna mai bakah dan bawhchhiatna a inphum ngeiah MNF chuan kan ngai a ni,” a ti.
“Dr Vanlalthlana Aizawl North II bialtu MLA hian a fund hi veng aiawh tura mipui thlan Local Council-te kutah a dah mang lo a. Local Council-te kuta a dah chhun pawh ZPM Unit leh thalaite’n an thawk tlangpui. MLA fund party-in an thawh phal a nih loh laiin ZPM Party deuh hlir a thawh tir a, Aizawl North Development Agency din chawpin party mite a vur hem hem mai a ni. Mipui sorkar din tum inti, chumia au ring ber chuan dan lo angin fund hi a hmang mek a ni. Hei mai hi a ni lo, MLA fund-a ZPM Block hruaitute leh a agency din chawp hmanga hna a thawh thenkhat phei chu a man nen a inphu lo hlawm hle nghe nghe a ni.
“MLA Fund hi a hman dan turah Party tana hman phal a ni lo a, amaherawh chu Ramhlun North ZPM Unit-II a President nilai Pu C. Lalmalsawma chuan “Keini ah chuan cheng khat pawh hi mimal account ah a luh belh lo a, party ten kan party tihchak nan kan hmang ve a chu zawng chu a ni mai e” tiin Social Media (Whatsapp)-ah chiang takin a post a. Hei hian dan phal lohin an MLA hian ZPM Party Unit hi MLA fund a pe ngei tih a lantir chiang hle a. A Unit President ngei hian Dr Vanlalthlana hi Party duhsak nan chuan dan pawh bawhchhe hreh lo a nih zia a puang chiang hle a ni.
“MLA Fund hman dan chungchangah leh Implementing Agency chungchangah hian Aizawl North II MLA ngei hian Whatsapp Group pakhatah, “Society hi sorkarah registered thlap a ni a. MLA nen MOU kan sign thlap a, chanchinbuah pawh kan chhuah thlap e. MLA fund a hna thawh a nih dawnin Implementing Agency tur ngaihven zel a ngai thin a, LC te emaw NGO te biak kual a, an remchan theih dan tur ngaihtuah a ni thin. Thenkhat phei chuan seal hman manah 2%-3% te an la thin a, a uiawm thin viau mai. A awlsam zawk nan leh felfai zawk a hma lak a nih theih nan agreement awm thlapin kan thawk dun a ni,” a ti a ni.
“He a thusawi hi ngun taka kan ngaihtuah hian thil inphum a tam hle a, Aizawl North II bialtu MLA, eirukna leh hlemhlet do inpeih inti, mipui sorkar din tum inti hian heng kan zawhna te hi chhang turin kan phut a ni.
1) MLA fund thawk tura implementing agency atana a hman NGO emaw LC te emaw hian a hna tak tak hi an thawk ngai lo em ni? Tute nge a hna tak tak thawk thin? Tunge a hlawkna tel thin?
2) Eng vangin nge Implementing Agency ni chunga seal hman man hi an lak? Tu hnen atangin nge an lak a, tuin nge pawisa chu pe?
3) Seal hman man latu NGO leh LC te hi tute nge?
4) A chunga ZPM Unit President thusawi atang khian Implementing Agency a MLA-in a hman thinte hian hna hi thawk loin ZPM Unit ho hlir hi a thawh tir thin zawk a ni em?
ZPM kalphung thar, mipui sorkar zawrh hi an mahni ngei hian tunah hian an bawhchhe mek zel a, social media-a an chakna hmang hian thalai leh mipui an bum mek zel a ni. Mipuite kan harh a hun hle.
“ZPM nihna dik tak chu Tumchhingi leh Raldawna thawnthua, Phungpuinuin Tumchhing thla ama thla emaw ti a, “Ka takin eng chawi lovin, ka thlain ngun bun chhing chheng, thi awrh chhing chheng,” a ti ang chiah kha an ni. An duhthusam ramah an cheng a, anmahni leh an thil tih mek han thlir ila kalphung thar tha lam engmah a awm lo. Kalphung hluia kal an tihte aiin an buai zawk a, kawng tam takah phei chuan an kalphung thar hi kalphung hlui aiin a chhe zawk a, an sorkar lo chung pawhin Party mi bil an invulh nasa hle a, dan pel hialin an kal duh a ni.
Kalphung thar thalo tak an kalpui mek avang hian ZPM parchhuan a tawp a, lan ropui zo lo hotu hawipir pathum, hawi lam hrang vekte chuan an tana ban rinawmte an leng per ur ur ta mai a ni. ZPM hi a hrechiang hmasa apiangin an bansan a, an bang ta chum chum mek a, an mahni leh an kalphung dik tak hrechiang ve lo mipui bum an tum mek zel a. ZPM bumna thang atang hian Mizo mipui tang mek te talchhuak a, kalphung nghet Mizo Hnam Party MNF-ah hnam thinlung pu zawng zawngte lo lawi khawm vek turin kan sawm tak meuh a ni,” a ti bawk.
