Information & Public Relations Minister Pu Lalruatkima chuan vawiin khan NEC atanga sum hmuh hmanga sak Lianchhiari Run (A Multi Facility Centre), DIPR Directorate bul ami chu vawiin khan khuallian niin hlanna hun buatsaih chu a hmanpui.
Minister Pu Lalruatkima chuan thu sawiin, khawpui laili taka department thawktute leh mipuiin an chhawr tangkai tur multi facility centre – ‘Lianchhiari Run’ infrastructure tha tak sak a ni chu ropui a ti a. Inhmuhkhawmna tur conference hall te, photo leh art exhibition neih na tur remchang tak te, theatre, vantlang tan lirthei hun na tur parking area zau tak leh facility dang dang he building in a ken tel chu tangkai taka hman a nih a beisei thu a sawi. Minister chuan I&PR Department chu sorkar hmalakna puangzartu, sawrkar leh mipui inkar laichinna siam kawngah te, films, art leh adangte hmasawnna atana hma lak kawngah leh, journalist-te leh sorkar inkar thawhhona atan mawhphurtu pawimawh tak a nih thu a sawi a. Minister a nih angin department hmalakna hrang hrang pawh tihlawhtling tura theihtawp a chhuah thu sawiin, kum nga chhungin kawng hrang hrangah hmasawnna tam tak hmuh a nih thu a sawi a. Lianchhiari Run sak chungchangah hian rokhawlhna hrang hrang awm chho mahse, hetia puiltin a nit a hi lawmawm a tih thu a sawi a. NEC in project atana a ken tel bak a chhung cheibawlna tur mamawhte chu SEDP atanga sum hmuh a nih thu Minister hian sawiin lawmthu a sawi bawk a ni.
Lianchhiari Run (A Multi Facility Centre) hi NEC sum nuai 900 leh State Sawrkar sum State Matching Share cheng nuai 100, a vaiin cheng nuai 1000 senga sak a ni a. A satu te hi Lushai Engineers an ni. December ni 14, 2017 khan sak tan niin, kum thum chhunga sak zawh tur ni mahse rokhawlhna hrang hrang avangin a hun takah zawhfel thei a ni lo a. A building ah hian chawng (storey) pasarih awmin, elevator (kg 560 dawl thei tur) 2 dah a ni bawk.
Building chhawng hnuai ber/ ground floor (Tennis Court Bus Stand opposite) hi MzSRLM in Self Help Group ten an thil siamchhuah zawrhna Sales Outlet atan an luah dawn a. Chawng hnihna hi two wheeler 65 parking atan duan niin, chawng thumna pawh lirthei ke pali nei 20 bawr vel parking tho a ni a. Chawng li na ah hian officer room leh staff awmna nakah lirthei ke pali nei 8 vel dahna tur parking space a awm bawk a. A chawng nga naah pawh director leh staff room engemawzat leh lirthei dahna tur tlem a zawng a awm a. Chawng ruk na ah Conference Hall leh Art Gallery awm lehin, a chawng chung berah mi 100 bawr vel leng Mini Theatre leh Exhibition neih theihna tur Open Terrace siam a ni bawk. Heng room zawng zawng zau zawng bawlhkhawm hi 3467 square metres a ni.
