October 20, 2023 (Zirtawpni) hian Aizawl North-I Congress Conference, Bawngkawn South YMA Hall (Cultural Centre) ah hman a ni a. He hun hi Pu Lalnunmawia Chuaungo, Vice President MPCC in a hmanpui a. Mi thar 175 a lawmlut bawk. He hunah hian Dr. Vansanglura, Principal, Serampore College leh Pu Lalthara IAS (Rtd) te’n thu an sawi a, Resolution pass a ni bawk.
Pu Lalnunmawia Chuaungo, Vice President chuan, Mizoramah Sorkar tha leh rintlak, mipui tuihalna ti reh turin Congress party chuan hma kan la dawn a. Thalaite pawhin an theihna leh thiamna hmang ngeiin hlim takin an tuina kawngah ngei ei an zawn theihna turin ruahmanna siam a ni ang. Kum 5 chhungin thalai nuai khat tan eizawnna siam sak hi kan tum a ni, a ti.
Pu Lalnunmawia chuan, Hlemhletna leh eirukna tih tawngkam Mizorama tlanglawn taka hman a ni hi pawi ka ti a, he tawngkam hi umbo ka duh tih sawiin, Eirukna sual hi thu maia haw lova, thil tih leh a tak taka haw turin Mizoram mipuite ka ngen a ni, a ti bawk.
Pu Lalthara IAS (Rtd) chuan Congress party chu Lungpui chunga nghet taka inrem Party a ni tih sawiin, Kristian te’n Chanchintha thlamuang taka Kohhran te’n kan hril leh theihna turin Congress-in nasa takin hma a la a. Tunah hian Central-ah BJP paihthla turin Congress kaihhruai I.N.D.I.A (Indian National Developmental Inclusive Alliance) chak takin an kal mup mup a. BJP thlipui in nasa takin India ramah hnam te nau zawk leh Kristian te a nam sawk sawk a. Manipurah Kristian te nasa taka nghaisak leh Biak In suasam a nih laiin Manipur BJP sorkar leh Central BJP sorkar in a hre lo der tlat a. BJP sorkar hi rang taka paihthlak a nih theihna turin tangrual pawl I.N.D.I.A hian vote vbch 65 chuang a nei, BJP leh a support-tu party in vbch 23 chauh an neih avangin an rorelna namthlukin a awm dawn a ni, a ti.
He huna thusawitu Dr. Vansanglura, Principal, Serampore College chuan, India ram innghahna Constitution suasam a nih chungchang sawiin, India ram chhunga hnam hrang hrang leh sakhaw hrang hrangte humhalh a nihna tura fel taka duan, a chhungah thlamuang taka kan lo awmna chu paih a ni a. He BJP sorkar hlauhawmzia leh a thahrui tih chah hi a tul a. Tuna inthlan hi tunhmaa inthlan ang mai mai a ni lo. Kan himna leh kan boralna kawng a ni, a ti.
Resolution
1. Pu Lalsawta kaihhruai Congress Party hi kan ring tawk a, Congress Party hian sorkar tha tak kan siam ngei ang.
2. Congress Party sorkarna hmangin Mizoramin Hmasawnna rahbi thar a tuk thei tih kan hria.
3. Aizawl North-I ah Pu Lalnunmawia Chuaungo a tlin ngei theih nan tha thlah lova tang mar pat turin kan intiam nawn leh a. Aizawl North-I mipui te MLA tha tak kan neih theihna tura min tanpui turin kan sawm a ni.
He hun hi Pu Lalrosanga, President, Aizawl North-I Block Congress in a kaihruai a. Rev. G. Chhunthuama, Bawngkawn bialtu Pastor-in hunserh hmangin, Pu Hmingthansanga, K. Zualbawihi, Lalthlengliani, Lalthlamuanpuii te an zai bawk.
