Aizawl, May 7 : Ni 3 awh Ministry of Health & Family Welfare, New Delhi leh Gujarat sorkar țangkawpin an buatsaih “14th Conference of Central Council of Health and Family Welfare (CCHFW),” “Swasthya Chintan Shivir” ti a sawi bawk, Tent City, Kevadia, Gujarat-a neih mek chu vawiin khan a hmawr bawk a ni a, Health Minister Dr R. Lalthangliana pawh he hunah hian telin thu sawina hun tha tak a nei a ni.
Mizoram sawrkarin hriselna kawngah hma a lak dan chungchang sawiin Sub-Centre Health & Wellness Centre tha taka kalpui a nih thute, ASHA/Health Worker te hnathawh dan, damlote kalchilh a, nau chhar thlenga an thawh dante a sawi a, thingtlang kilkhawr ber ber thlenga an fan chhuah thin thu leh damdawi in awm lohna hmunah an tangkai zia a sawi a ni.
Dr Thangtea chuan sawrkar laipuiin tehfung hrang hrang hmanga a endikna (national level survey) hian Mizoram sawrkar hmalakna that zia a tarlang tih sawiin, NITI Aayog in kum 2017 atanga endikna a kalpui khaikhawmna “Healthy States, Progressive India” ah Mizoram chu State te ho (smaller states category) zingah pakhatna a ni, a ti a. Infant Mortality Rate (naupiang 1000 zela thi zat) ah phei chuan kan chhuanawm hle a, kum 2009 a IMR 36 ni kha kum 10 hnu, 2019 ah chuan 3 ah a tla tawh a ni, a ti.
State danga awm ve lo Health Clinic Mizoram sawrkarin a ruahman thu pawh sawiin, tun dinhmunah Health Clinic 200 vel kan nei a, neih belh zel turin hma kan la mek a ni, a ti a. Health Clinic chu Health sub-centre ang deuh a kalpui a nih thu leh, health worker pakhatin a enkawl thute, khua/veng pakhat chin am huam tir thin thute, khawtlang hotute nen inrawn tlanga hmalak a nih thin thute a sawi a ni. .
Dr Thangtea chuan COVID-19 hripui leng avanga kan harsatna tawh atanga kan inzir a ngai a ni tih a sawi a, Mizoramin COVID-19 hripui dona kawngah kan ti tha ni a min sawi chhan chu mi zawng zawng kan tan rual vang a ni, a ti a. Sawrkar department hrang hrang bakah Tlawmngai pawlte, Sakhaw hrang hrangte bakah private daktawrte leh damdawi in te nen kan tang tlang a, mipuiin min thlawp tlat avangin kan che tha a, hetiang hi hmun dangah a awm ve loh avangin sawrkar lian leh ram ropui tak takte pawhin an tawrh nasat phah a ni, a ti bawk.
