MNF General Headquarters chuan ni 16/7/2024 khan Press Release a tichhuak a, he Press Release avang hian Pu Hrangchalliana, Ruantlang, Champhai chuan he Press Release a hming sign tu Lalthakima, Joint Secretary, Media & Publicity Department, MNF leh Social Media lama post chhawngtu Lalmuanga, Tuirial Airfield te lakah Criminal Complaint No. 308/2024 Court-ah a thehlut a. He a case thehluh hi ni 22/5/2025 khan Court chuan Order tichhuakin, intihmingchhiatna lam thil a hmuh loh avangin thu tling loah ngaiin a hnawlsak a ni.
MNF Press Release Memo No. 131/2024 dt. 16/7/2024 ah hian Vairengte leh a chhehvel a kuhva rah ro bothlau zawnchhuah tuma hmalakna kal zela Mizoram Police ten ni 7/7/2024 a Phaisen a 407 truck trip 1 leh an lakchhuahna kudam atanga bag 145 vel lakchhuah anih thu puanzar anih chungchangah heng kuhva neitu hi Pu Lalchhuanliana, Ruantlang, ZPM Champhai South Block Information Joint Secretary ni a hriat a nih thu tarlan a ni a. A unaunu chu Ruantlang ZPM VC member niin, a unaunu pasal hi ZPM Champhai South Block President ni a hriat a nih thu tarlan a ni bawk a ni. ZPM South Block President Hrangchalliana chuan min ti hmingchhia tiin Court ah thubuai a thehlut ta a, a thu thehluhte hi Court chuan intihhmingchhiatnaah ngai loin, thu tling a ni lo tiin a hnawlsak ta a ni.
MNF Party chuan, “ZPM sorkarna hnuaia ruling party mi leh sate huat thu a chhe em em mai hi thil vanduaithlak tak, nuihzatthlak takah MNF Party chuan a ngai a. Thil ho te te-ah FIR thehluh an uar lutuk leh Court-a zualko an ching em em mai hian ngaihdan dang neite reng reng an ngaihtheih loh zia leh an beidawn zia a lantir a, India danpui hnuaia duh zawng leh vei zawng sawi chhuak thei tura mitinin zalenna kan neih nek chep an tuma a hlawhchham chho zel hi mualphona nasa tak a ni tih hre tur leh a tawpah chuan diknain ro a rel thin a ni tih lo hre thar turin MNF chuan a chah a ni,” tiin thuchhuah a siam.
