Nimin Dt. 9.5.2022 (Monday) 2:00 P.M khan Conference Hall, Hawla Indoor Stadium, Republic Vengthlang-ah Mizoram State Sports Council chuan General Body Meeting an nei a. MSSC General Body Meeting hi Mizoram State Sports Council President leh Minister of State (I.C.), SYS, ICT leh Tourism ni bawk, Pu Robert Romawia Royte-in a kaihruai a. Pu Robert Romawia Royte, President, MSSC chuan he hunah hian MSSC Annual Report 2021-2022 chu a tlangzarh a. Annual Report-ah hian kum 2021- 2022 chhunga MSSC hmalakna hrang hrangte kimchang taka tarlan a ni. MSSC President chuan MSSC Memberte chu chibai bukin, General Body Meeting hi Covid hripui avangin duh anga zinga koh theih a nih loh thu a sawi a. Chumi hnuah Pu K.Lalhmangaihzuala, Joint Director SYS tawngtai turin a sawm a, rorel nghal a ni.
MSSC Act – 2002, Chapter – VI; Section – 19 in a phut angin MSSC Annual Programme 2022-2023 chu pharh a ni a, kum 2022-2023 budget (B.E) atan Rs. 1107.55 lakhs chu lungrual taka pawm a ni.
MSSC Act, 2002 Section II (1)-in a sawi angin infiammite hamthatna “Mizoram Sports Awards” chu lungrual taka pawmtlan niin, guidelines te pawh siam a ni tawh bawk. Mizoram Sports Award hi kumtina infiammi tithate Cash Incentive Award pek thin bakah Sports-a State tihming thatute pek thin tur a ni dawn a ni.
MSSC (Procedure for Management of Assets) Regulations, 2022 draft pawmtlan a ni a. MSSC (Procedure for Management of Assets) Regulations, 2022 dan hmang hian uluk tak leh mumal zawkin MSSC hmunhmate enkawl a ni thei dawn a ni.
MSSC (Formation and functioning of District Sports Committee) Regulations, 2022 draft pawh pawmtlan a ni a. He Regulations, 2022 inkaihhruainaah chuan Chairman-ah District-tin Deputy Commissioner te an ni ang a, Secretary-ah District Sports & Youth Officer te emaw sawrkarin a ruat thin ang. Office Bearers dangte chu thlan (elect) tur an ni ang.
MSSC-a thawkte indaihlohna leh tihchak (restructure) a pawimawh thute sawiho niin, a tul anga sawrkara bawh zui zel a tul thu pawh sawi a ni a. Tin, sports discipline hrang hrangte hmasawnna tur leh tanlak a tulnate sawi a ni bawk.
Mizoram Cycling Association (MiCA) chu an inrelbawl dan te, Mizo thalaiten Cycling an hlut dan te leh Sports Discipline pawimawh tak a lo nih chhoh tak zel avangin MSSC recognised Sports Association 33-na ni turin pawm a ni.
