Vawiin a ZPM chhung inkhawm ah Dr. Kenneth Chawngliana, Ex-MLA, Vice President chuan thusawiin, “Thutlukna mumal siam ngam lo sawrkar kan hrawn mek a, mahni inphenna atan pawl hrang hrang ngaihdan kan khawnkhawm awl lo mai te hi a vanduaithlak hle a ni. Dan kenkawh lamah kan sawrkar hrawn mek hi a hlawhchham chiang hle a, mipui kan that em avangin buaina lian zawk kan la pumpelh hram hram niin a lang. Heng thil thleng hrang hrang ngaihtuah hian kan ram mamawh chu Kalphung thar- Mipui Sawrkar hi a ni a, thlei bik nei lova rorelna, dan ngaipawimawha a taka hmala ngam, huaisen taka thutlukna siam ngam sawrkar siam turin ZPM chu a inbuatsaih mek a. Kan sawrkar lo hrawn tawh ten an lo hlamchhiah thil tha ti turin, hmasawnna chhuang taka sawi tham nei turin a inbuatsaih mek a ni,”_ a ti.
ZPM Vice President chuan, _”Kum 30 chuang zet party pahnih Chief Minister leh Party President ni kawp ve ve ten min lo kaihruai tawh a. Tih dan thar, hmasawnna thar awm miah lovin a ngai ang bawkin min kaihruai a, Sem Policy kalpuiin chu policy chuan mipui min tibeidawng hle a, hmasawnna lian tham hmu mumal lovin tun sawrkar pawh hi kan thlah liam leh dawn ta a ni. Kan sawrkar lo hrawn tawhah hian party mi hleihluak taka induhsakna a hluar hle a, nawmchenna leh mahni inhaivurna sawrkar hi langsar taka kan hmuh thin a ni. RTI hmangin thil dik lo tam tam tun kan sawrkar hrawn mekah hian hmuh a ni chamchi a, thil dik lo titute hrem an nih thu erawh kan hre khat hle thung lawi si. Hna lak chungchangah induhsakna uchuak kan hmu reng a, dan lova contract inpek leh hnathawh tha lo langsar tak tak te hi Zoram titi a ni mek reng a ni,”_ a ti
