NHM hnuaia hnthawktute chungchangah vawiin khan Lalduhoma, MLA ZPM Leader chuan Press Statement siamin, “NHM hnuaia hnathawk hi mi 2000 chuang an awm mek a, heng mite hi central sawrkarin kan harsatnate phuhruk tura min chhawr sak te an ni. Amaherawhchu, kumkhuaa central sawrkar ring tur kan ni lova, zawi zawi a state sawrkar kuta awm tur an ni. India rama state zawng zawng tih theih deuhthaw hian an regularise tawh a. Kum tam tak chhung Mizoramah kalpui a ni tawh chung hian mi pakhat pawh an la regularise thei lo a ni. Sawrkarin study team te siamin report te an thehlut a, mahse, eng nge an zir chhuah a, eng nge an recommend tih pawh thup tlat a ni ta a, tunah hian loh theih loh avangin an nuar ta a ni.
“Health department hnuaia NHM-ah hian thawktu hi 60% vel an awm a, tunah hian 60% chu an chawl ta vek a ni. Heng ho tel lo hian damlo enkawlna a kal mumal thei lova. He thil hi thleng lo tur hian sawrkar hian a tih dan a ngaihtuah a ngai a ni.
“Chutih lai mek chuan sawrkar hian vau zuiin banah te a vau zui hi hriatthiam har kan ti hle a. Miin kum tam tak he hna hi an lo thawk tawh a, covid-19 hripui len lai pawhin hrileng karah an nunna dahkhamin mipui damlote min enkawl a ni.
“Heng kan unau nuar mekte kan sawrkar hian a tuam dam thei lo hi a pawi kan ti a, damlo tam takin nunna hlu tak an chan phah mai ang tih kan hlau a, heng kan unau nuar mekte hi kan lainat a, an harsatna te a rang thei ang ber a sukiang tûrin sawrkar kan phut a ni.
“Hetiang chanchin hriat fo mai hi a mualpho thlak kan ti a, sawrkar hi a duhna lamah chuan a chak em em a, contract hna inpekah te chuan an chak em em a ni. Tuna lungawi lo te hi chu damlo enkawlna thil a ni a, anni kher kher hi chu kan sawrkar hian an damdawi pe vat turin kan phut tlat a ni,” a ti.
