Vawiin ni 11 August, 2022 (Ningani) hian Govt. Zawlnuam College chuan Fresher Social programme an hmang a, Hachhek bialtu MLA Pu Lalrindika Ralte chuan Khuallian niin a hmanpui.
Pu Lalrindika Ralte chuan zirlaite hmaah thu sawiin, “Mihring harsatna tawk lo an awm lo a, kei ngei pawhin harsatnate hi ka lo paltlang ve tawh thin. Amaherawh, chu harsatna hi harsatna angin ka hmachhawn ngai lo. Ka hmaa thil lo thleng ve rêng angin ka lo hmachhawn thung ṭhin. Kan bulṭanna chu duhthusam a ni lo thei a, kan college pawh kan duhthusam a ni lo mai thei. Nimahsela, bul ṭanna hi a len a ngai lo. Kan bulṭanna chu lian lo mahse, kan tawp dan hi a pawimawh. Kei pawh hi engmah ka ni lo a, ka bul ṭan dan pawh a ropui hek lo. Kei aia lehkhathiam zawkte hian tih tak takna, huaisenna leh tumruhna innei a nih phawt chuan kei aia sang daih in ni phak dawn tih ka hria. Ṭhalaite hi engtianga nun hmang turin nge kan nih a, eng nge nih kan tum tih hi kan inzawh nawn fo a ngai a ni,” a ti.
Pu Lalrindika Ralte chuan, “Zawlnuam College zirtirtute hi hmun danga zirtirtute aia thiam lo bik an ni lo, zirna in ṭha tak in nei bawk. Hlawhtling turin mamawh dang emaw, chhuanlam tur emaw in nei tawh lo, nangmahni in pawimawh ber. Complaint tur in nei lo, zir rawh u. Chu chu hlawhtlinna a ni mai,” a ti bawk.
Pu Rindika chuan mipa te fuihin, “Mipate hian mipa kan nihna angin mawhphurhna kan nei. Hmeichhia aia sek zawkah Pathianin min siamna chhan hi chhungkaw enkawlna leh chawm tura mawhphurhna min pek vang a ni a. Mizo mipa ni si, nupui chawm zo lo nih hi a zahthlak. Lehkhabu kan chhiar a, finna kan zawng a, hriat ṭeuh hi finna a ni ti ta ila, inhnialna a tam ang. Hre si fing si lo an tam. Nimahsela, finna tak tak chu Lalpaah a awm zawk a ni. Duh duha nung thei emaw in inti ang e, in duhdan khan lo nun tum khang duh suh u. Khawvelah hian hlim tum a piang mi vakvai an ni zel. Hlimna hi zawn hmuhna tur dang a awm lo; hlimna dik tak chu Lalpa ṭih a, dik taka nun hi a ni. Thil sual tihin a hlim theih loh; hlim kan duh chuan thil ṭha tih mai tur a ni,” tiin zirlaite a fuih bawk a ni.
Govt. Zawlnuam College hi kum 1986 ah din a ni a, kum 2007-ah Provincialised a ni. Subject 6 – Economics, Education, Political Science, Mizo, English leh History zir theih a ni. Tunah hian Teaching staff 22 leh Non-Teaching Staff 6 an awm mek a, zirlai 88 an awm mek bawk.
