J.Lalramnghaka, General Secretary (Publicity Department), ZPM Thalai Headquarters chuan vawiin khan Aizawl Press Club-ah chanchinthar lakhawmtute kawmin, “Revenue Minister hriatpuina la pha chinte chauhin inhmun an dil thei hi dan ṭan chhan mumal awm lova chètna a ni,” a ti.
J.Lalramnghaka chuan, “In hmun (House pass ) dilna form hi revenue minister hnena phalna/hriatpuina la-te chauhin an lei thei a, revenue minister in form lei tura phalna a pêkte hnenah chauh house pass dilna form hi pek chhuah niin, revenue minister kaltlang khera house pass dilna form lak chungchangah hian, revenue department in RTI chhanna a pêkah chuan, he tianga ti tur hian dan ṭanchhan mumal tak a awm lo tih chiang taka tarlan a ni.
“Revenue minister phalna la pha chinte chauhin inhmun an dil thei hi mipuite tân phurrit lian tak a nih bâkah, a ṭul baka mahni thuneihna pholanna leh intih lalna chikhatah ZPM Ṭhalai chuan kan ngai a.Minister hnena phalna la turin revenue miniater hi a office-ah hmuh tur a awm mumal leh ngai si loh avangin inhmun pass siam duh mi tam takin harsatna an tawh phah bawk. Hetianga mahni intih lal duh luat avânga mipuite tana phurrit hi siam tawh lo turin revenue minister Pu Lalruatkima kan phut.
“Mipui sawrkar chu mipuite huapzo, mipuite harsatna tur ni lo, mipuite awlsam zawkna atana ding tur a nih laia inhmun dilna form ringawt pawh minister phalna leh hriatpuina la hmasate hnenah chauh pek a ni hi ZPM Ṭhalai chuan lungchhiatthlak kan ti a, MNF sawrkârah dan hnuaia intluktlanna a bo tial tial niin kan hria a, thil tithei leh thil titheilo inkâr a zau tial tial niin a lang; he thil hian MNF sawrkâr chu mipui sawrkâr a nih lohzia a tarlang chiang hle.
“Hetianga dan ṭan chhan mumal awm si lova revenue minister-in thuneihna amah leh amah a lo inpe chawp mai hi a chhan sawifiah ngei turin revenue minister kan phut a, hlawkna leh man ṭang a têl ve hial zawk em ni? tih hi kan zawhna a ni,” a ti bawk.
