Chief Minister Zoramthanga chuan nimin piah khan Prime Minister Narendra Modi chu a chenna inah a tlawh a, Nimin khan Minister of Defence Rajnath Singh chu New Delhi-a a pisa ah a hmu bawk.
Chief Minister chuan nimina Defence Minister a hmuhnaah hian, Cantonment board area-ah Mizoramin hmun a mamawh ve thu a thlen a. Helai cantonment board area-a state te tan ram dil theihna hmun awmah hian hmalaksak tura ngenin, Defence Minister pawhin a ngaihtuah turte hnena thlen a, theih anga bawhzuisak a tum tur thu in a chhang.
Heng bakah India leh Myanmar ramri chungchang an sawi dun bawk a. Chief Minister chuan Bangladesh leh Myanmar ramri pahnih ah Mizo telna paramilitary force dah tha a tih thu sawipuiin, Rajnath Singh chuan a tul anga la sawiho ni se tiin Home Minister te nen pawh sawiho tha a tih thu a sawi.
Chief Minister Zoramthanga hian Myanmar a remna siam turin India in hma a lak a ngaih thu Prime Minister hnenah hian a thlen a. Prime Minister pawhin ngaipawimawhin, remna siam chu mihringte tih tur pangngai a nih thu leh, theihtawp chhuah a nih tur thu in a chhang a ni.
Heng bakah hian Chief Minister chuan Assam Rifles sawn chhuah vat a tul thu te, MNF Returnee-te tana insakna tur puihna hma lo chhawp tawhte tihhlawhtlin a nih nana tanpui mamawhna te a sawipui a. Mipuiin HUDCO atanga loan an lo lak tawh cheng vaibelchhe 18 vel an laka rulh loh la awm rulh sak tura ngennate, Chief Secretary atana Mizo tawng thiam ngei pek a ngaih thu leh tuldang pawimawh te Prime Minister hnenah hian thlen in sawipui a ni.
