MPYCC President Dr.Lalmalsawma Nghaka chuan, “Healthcare bill bat rei lutuk chungchangah MPYCC in Ukul te hmangin sawrkarah Legal representation kan thehlut tawh a, a tul ang zelin Mizoram mipuite thlavang hauh nan High Court-ah kal zel tum a ni,” a ti.
Dr..Lalmalsawma Nghaka chhuan vawiin khan chanchinthar lakhawmtute kawmin, “MPYCC hian Mizoram sawrkarin mipuite Healthcare bill a bat sak rei lutuk hi kan ngaipawimawh a, Healthcare bill hrek anih avangin chhungkaw sing telten harsatna namen lo an tawk chho mek tih kan hriat hian a pawi kan ti a. Mi tamtakin pawisa puk chawp takmeuhin Healthcare hmachhuanin Damdawiinah an inenkawl a, bill an lak theih tak si lovah chuan mangangin, an ro neih ang chhun te hralhin, an damlohna senso puk rulhnan a kawtawpa tan a ngai leh si a, hei hi MPYCC chuan a pawi a ti takzet a ni.
“Kan Chief Minister zahawm takin, kum 2020 kumtir Assembly Session meuhah “A damlo apiangin damdawi Ina an rawn hman theih turin, In khat tan nuai hnih thlengin SEDP ah tunah hian kan dah vek tawh a ni”, tih chiang takin a sawi a. Amaherawhchu, August ni 20,2022 a RTI kaltlanga zawhna chhanna atanga a landanin Healthcare Scheme hnuaiah pawisa dah a awm lo a, bill pek chhuah theih loh anihna chhan chu bill pekna tur mamawh zat sawrkara atanga dawn a ni lo tih a ni. He RTI chhanna vekah hian August ni 26, 2022 thleng hian bill tang zat 28,448 awmin, a belhkhawmin, Rs.77,97,69,971(Vaibelchhe sawmsarih pariat dawn) a ni. He RTI vekah hian October ni 1, 2020 hnu lamah hian bill pek chhuah mumal a awm meuh lo a ni.
“Sum harsatna chhuanlamin sawrkarin Healthcare bill a hren lai mekin an duhsak zawngte tan contract chi hrang hrang an thawhsen loh an pe chhuak reng a. May ni 25, 2022 khan Congress Thalaiin Healthcare Society tlawhin, thil awmzia an lo zawt fiah tawh a. June ni 21, 2022 khan Chief Minister hnenah Healthcare bill pe chhuak tur leh an hren sak na chhan puang chhuak tura phutna Memorundum thehluh kan lo tum tawh a, hemi tum hian Chief Minister-in a lo hmu duh lo a ni. July ni 22, 2022 vek khan Aizawl Tennis Court kawtah Healthcare bill batsak chungchanga mipuite thlavang hauhna inkhawm a lo huaihawt tawh bawk a ni.
“Hetiang kawng hrang hrang lehkha thehluh, mipuite harsatna Media kaltlanga tarlan leh mipuite thlavang hauhna inkhawm huaihawt hial anih tawh hnuah pawh kan sawrkar hian hma a la tha duh lo a. Chuvangin, Congress Thalaite chuan mipuite tawrhna tawh mek hi en liam harsa kan ti a, dan hmanga sawrkar kar a tul pawhin theihtawp chhuaha hmalak zel kan tum a ni. Hemi bawhzui zelna tur hian Mizoram sawrkar hnenah Healthcare bill bat chingfel turin kan ukil te hmangin legal representation kan thehlut tawh a, vawiin ni thleng hian chhanna kan la hmu lo a ni. Sawrkar hian Healthcare bill tang avanga mipuite harsatna a chingfel vat a tum lo anih loh chuan Congress Thalaite hian a tul angin Court sang zawkah mipuiten an chanvo dik tak an hmuh theih nan kal zel a tum a ni.
“Kan sawrkar hrawn mek hian kawng hrang hrangin mipuite min sawp nasa a, sawrfu theih zawng zawngah min sawrfu zo tawh a. Chuvang chuan huaisen taka mipuite thlavang hauh ngam hi an rawn pen chhuah a ngai a ni. Vawiin niah ngei pawh hian Congress thalaite mipuite thlavang hauhin kan rawn au chhuak a, a tul anih chuan Court sang zawkah PIL thehluh thlengin hma kan la dawn a, mipuite pawh hemi kawnga min thlawp tlat tur hian kan sawmin kan ngen a ni,” a ti bawk.
