Home Minister Lalchamliana hovin vawiin khan SAD Conference Hall, MINECO -ah kumin Krismas, Kumthar leh Puja (Diwali leh a dangte) lo thleng turah halpuah, halmawi, silailem mu nei chi leh sky lantern khap chungchang Sawrkar mi pawimawhte leh tlawmngai pawl hruaituten an rel. Heng hal theih hrang hrangte hi mihring hriselna atana thil pawi thei a nih avangin khap tlat ni se, an ti.
Khapna thupek hi a rang thei ang bera tihchhuah turin meeting chuan a rel a. Dan anga khapna thupek tihchhuah a nih veleh Sawrkara dan leh thupek kengkawhtuten hma an la tan nghal dawn a. Chutiang bawkin, veng hrang hrangah tlawmngai pawl te leh Local Council te pawhin anmahni zawn theuhah hma lak tan nghal ni se, tiin meeting ah hian rel.
Halpuah, halmawi leh a dangte mihring hriselna atana a pawizia inzirtirna leh hal lo tura mipui thinlung hneh tura campaign uar leh zuala kalpui ni se, tih meeting-ah hian rel a ni a. Veng tina information mike te, print leh electronic media te leh social media kaltlangin awareness campaign kalpui tum a ni. I&PR bultumin halpuah leh halmawi hal that lohzia lantir thei tur skit/drama tawi insiamsiak buatsaih ni se tiin rel a ni a, hei hi video clip siama thehluh tur a ni.
Sumdawng te mai bakah mimal leh chhungkaw tin te chu heng halpuah, halmawi, sky lantern leh silailem mu kapchhuak theite hi chah lo turin ngen an ni a; lo chah ru emaw, zuar an awm a nih chuan dan angin hrem an ni dawn a ni. Assam Rifles, BRTF, BSF leh sipai hmunah halpuah an hal loh na turin khapna order pek ni se tiin meeting chuan a rel a. Mizoram ram ria check gate awm zawng zawngah uluk lehzuala lirthei lo lut endik tur te, sumdawnna hmun leh kudam te a tul dan a zira endik/check te leh police te bakah tlawmngai pawl ten hunpui laiin duty tur insiam leh ni se tih te an rel a ni.
Sumdawng bungraw phur lirthei te mai bakah a tul dan angin mimal lirthei te pawh endik ni se, tiin vawiin meeting chuan a rel a. Khapna thupek bawhchhia te chu police te mai bakah mipui mimir pawhin thuneitute hnenah an report thei a ni tih sawi lan niin whatsapp kaltlanga thlalak emaw video emaw hmanga thehlut duh te tan pawhin awlsam zawka an thehluh theihna tur phone number siam ni se, tiin meeting ah hian rel a ni bawk.
Meeting hian kum kaltaa khapna kalpui a nih dan a thlir let a. Krismas leh Kumthar bawra dan bawhchhia mi 26 man niin case register zat hi 23 a ni a, court in an zinga 18 a hrem (convict) tawh a, court case kal lai mek 5 a la awm a ni.
