Vawiin November ni 19, 2022 (Inrinni) hian Hachhek bialtu MLA Lalrindika Ralte chuan a bial chhung W. Bunghmun-ah MNF VC leh BJP VC member-te Congress Party-ah a lawmlut a. Lawmluhna inkhawm hi W. Bungtlang Community Hall-ah neih a ni.
He hunah hian Lalrindika Ralte, MLA chuan thu sawiin, “Ram kaihhruainaah hian kan ram leh hnam tan kan theihna sang ber kan hlan tur a ni a. Kan ram kaihhruainaah hian dik leh rinawmna khawiah nge a awm? Thil dik lo titute hi an inthlahrung ta lo khawp mai. Sorkarna siamtute hi mipui kan ni a, chuvangin, inthlanna hi kan ngaihpawimawh a ngai a, kan ti mai mai tur a ni lo. Mi ṭha ram hruaitu hi kan mamawh a ni. Sorkar ṭha nei turin mipuite hian mawhphurhna kan nei a ni. Mahni chhia leh ṭha hriatna hmang thei lo nih hi i tum lovang u. Kohhran te, kuthnathawktute zawng zawngte pawhina kan mamawh chu sorkar ṭha a ni. Ram leh mipui hmasawnna chu mipuite kutah a awm a. Tin, mi retheite hian sorkar ṭha hi kan mamawh zual hle bawk a ni,” a ti.
Lalrindika Ralte chuan, “Vawiin ni a kan sorkar hi mipuite siam a ni. Nakumah kan inthlang dawn. Eng ang sorkar nge kan din leh dawn? Mahni hmasial, dik lote hnawl ngam turin chakna kan nei a. Mi dik lote kan hnawl ngam lo a nih chuan kan hma lam hun a thim khawp ang. Kan ram leh hnam dinhmun hi siamṭhat theih loh a ni lo va, beidawng mai tur kan ni lo, a thlak danglam tura kan thawh erawh a ngai a ni. Politics hi a dik chuan ram hian hma a sawn dawn. Thufing pakhat chuan Sorkar ṭha a retheih nih a zahthlak a, sorkar ṭha lo va hausa nih erawh a zahthlak tiin a sawi a. Kan ramah sorkar sum harsat zia kan sawi nasa a, hetih laia lo hausa fal an awm a nih chuan kan ram leh hnam min phatsanna a ni a. Chutiang mi chuan ram hruai tum tawh lova lo inthiarfihlimna chang hria se an mahni tan leh mipuite tan a ṭha zawk a ni,” a ti bawk.
Lalrindika Ralte chuan, “Khawvel ropuina leh hausakna an tih hi ka thlahlel ve lo, kan ramin hma a sawn a ngai. MLA kan ni a, ṭhenkhatin ‘Sir’ te min ti a, Sir tia inkoh hi a ṭul lo, Sir tiin min ko ta ula, kan ramin hma a sawn si loh chuan eng tihna mah a ni lo, kan ramin hma a sawn a nih phawt chuan ka hming pawhin min ko ula, kei chu ka lawm em em ang,” a ti bawk.
Heti hian Lalrindika Ralte hian November 12, 2022 atanga a bial fan programme chu a zo fel ta a ni.
