Vawiin khan Central YMA chuan thuchhuah siamin, “India leh Bangladesh inrina, Bangladesh ram chhunga cheng Mizo hnahthlak ten tunlai hian harsatna lian tak an tawk mek tih hriat a ni. Diklo taka hek an nih avangin, tunah hian Mizoram lamah raltlan engemaw zat an lo lut tawh a, Sipai hlauva tlanchhia, ramhnuaia tang khang an awm mek bawk. Heng kan nunaute harsatna hriain, YMA chuan Mizoram Sawrkara kan hotu ber Chief Minister Pu Zoramthanga sawipui a ni a, kan unaute thlamuang taka an awm theihna tura hmala tura ngen a ni.
“Tuna raltlana rawn lut mekte chhawmdawlna kawngah Central YMA chuan theihtawpin hmalak a tum a, chhawmdawlna hmasa atan Rs. 50,000/- (Cheng singnga) pek remtih a ni. He harsatna hian hun eng chen nge a daih dawn hriat anih loh avangin, kan unau harsatna tawkte chhawmdawl an nih theih nan, Sub-Headquarters, Group leh Branch YMA-te tan la tlang turin kan inngen e,” tiin Central YMA chuan, “Mizo mipuite pawh he harsatnain a tuam mek, kan unaute tana ke pen turin kan insawm e,” an ti bawk.
