MNF Thalai chuan, “Pu L.Thangmawia, Lengteng bialtu MLA, MNYF Hrqs. President ni bawk chuan Mizoram University aṭanga ‘Effective of ICT in Mathematics Education in Mizoram’ tih thesis title hmanga Doctor of Philosophy(Ph.D) a hmu thar hi kan lawmpuiin kan chhuang hle a. Dr L.Thangmawia hi Kum 1989 HSLC Exam-ah Mizoram pumah 5-na niin Mathematics-a mark hmu sangber a ni bawk a ni,” an ti.
Thuchhuahah chuan, “1992 khan NEHU hnuaia PU(Science) exam-ah Mathematics-ah Letter a hmu bawk a, Mathematics-ah Mizote zinga JRF tling hmasa ber a ni. M.Sc a zawh hma, a zirlai mekin kum 1998 khan a tling a ni. Tin, tunah hian PUC-ah Mathematics Head of Department(HoD) nihna a chelh mek bawk a ni. Lengteng Bial mipuite pawh MLA chhuanawm tak inneih avangin kan lawmpui hle che u a ni.
“Dr. L.Thangmawia hi zirna lama Mizo ṭhalaite hmakhua ngai em emtu a ni a. “Mizoram leh zofate’n kan mamawh chu Zirna a ni” tih hi a kalna hmun apianga a thusawi ṭhin a ni nghe nghe. Amah hi Pathian ṭih mi, rawngbawlna lamah pawh theih ang tawk tawka inhmang mi ani a. Nationalism-ah a chiang a, harsatna tam tak paltlangin NEHU hnuaiah Gold Medallist (Mathematics) hial ni thei leh ram leh hnam tana rawngbawl thei turin tunah MLA hial a lo nih hnu pawhin zirna ngai pawimawh mi tih hriat takin Ph.D a hmu hi fakawm kan tiin kan chhuang hle a ni.
“A thiamna leh finna te kan ram leh hnam tana hmang chhunzawm zel turin duhsakna kan hlan a. Chumi tihlawhtling thei tur chuan Pathianin chakna leh hriselna pe zel rawh se, tiin MNYF Hqrs. chuan duhsakna kan hlan a ni,” an ti bawk.
