Chief Minister Zoramthanga hovin vawiin khan CM office Conference Hall-ah PMGSY (Pradhan Mantri Gram Sadak Yojana) Review meeting neih a ni a. He scheme hnuaia state chhunga kawng siam hna thawh mek leh hmabak awm te sawiho a ni.
PMGSY hi kum 2000 atang khan ram pumah kalpui a ni a. Mizoramah chuan Mizoram PWD chu executing agency a ni a. Vawiin meeting-ah hian PMGSY I leh PMGSY II hnathawh chipchiar taka thlirho in, tun dinhmunah khaw 231 ah kawng 297, belhkhawmin 4238.29 km a thui siam a ni tawh a. Ministry of Rural Development hnena sum mamawh thlen a nih dan te vawiin hian tarlan a ni a. State leh national level a kawng siam hna that leh that loh endikna – State Quality Monitors leh National Quality Monitors chungchang sawiho ni bawkin, quality monitoring hi uluk leh zuala kalpui ni se tha an tih thu an sawi a.
PMGSY III atanga inpuahchahna te vawiin meeting-ah hian report niin, he scheme hnuaia hnathawh a lo that leh zual theihna tura rawtna te sawiho a ni bawk a. Chung zingah chuan khawl leh endikna hmanrua tha zawk neih te, contract hna chhawng tam avanga harsatna awm thin te tarlan niin, field staff te training pek leh adangte a tel a ni.
