Vawiin ni 29.11.2022 (Thawhlehni) hian Laila Hall, College Veng, Siaha-ah Mara District Congress Committee (MDCC) General Assembly vawi 22-na neih a ni a. MPCC President Lalsawta leh MPCC Vice President Lalthanzara-ten an hman pui. MPCC President Lalsawta hian Congress Party zawm thar mi 240 a lawmlut nghal bawk.
MPCC President Lalsawta chuan, “Vawiin a kan kal khawm chhan chu Pathianin he leia Lal Isua lal ram din tura min dah vang ni. Politics-a kan awm chhan chu Mara ram chauh ni lo, Zoram khawvelah a lal ram thlen theihna tura hna pawimawh chelhtute kan nih vang te, ram tha zawk, rorelna tha zawk buatsaih tur leh Pathianin mawhphurhna min pek hlen tura kal khawm leh awm kan ni. Tihtur neih loh vanga kal khawm mai mai kan ni lo,” a ti.
Lalsawta chuan, “Kan ramah neutral tam tak, Kohhran mi leh party mi tam tak kan awm a. Chung chuan nakum 2023 inthlan kan thlir. Nakum inthlan turah Congress party chuan hautak lo takin, ram tana hnathawk thei tur, mi tling ngei tur Candidate kan chhawp chhuak dawn, an retheih avangin kan hnawl ngawt dawn lo,” tih sawiin, “Party dangten inthlana chak zawk nih tumin pawisa cheng nuai zahnih zathum an rinchhan dawn. Keini chuan Kut fai leh thinlung thianghlim takin he inthlan hi kan hmachhawn dawn, pawisa chakna hi tihhlum kan tum a ni. Chutiang a thlen theihna tur leh ram leh hnam tana hna tha an thawh theih nan kan MLA candidate-te ti hautak lo turin ka ngen che u a ni. Thil harsa takah in ngai mai thei, mahse thil tih theih a ni a, Pathian rinchhanin nangni leh keini hian kan ti thei a ni,” a ti.
“BJP MDC thenkhat leh MNF MDC thenkhat, an thawhpuiten an hriatpui nge hriatpui loh pawh hriat lohten Mara ram tana hnathawka kan buai laiin min barakhaih thut mai a, kan duh ang chu a ni lo. He thil thlengah hian Congress chu kan buai lo. Congress MDC-te a hma angin nghet takin an la ding reng a ni,” tih sawiin, “Mara District Council sorkar-a thil thlengah Congress MDC palite rinawm tak leh kut fai taka an awm hi Congress nihphung tur dik a ni. Mara mipui te, Lai mipui te leh Chakma mipuite hi Congress sorkarah chuan dinhmun duhawm leh tha zawk kan ngaihtuah sak dawn che u a ni,” a ti a. “Congress chawrno tha leh mek hi Mizoram tan, kan ram tan a ni. Rinawm tak leh dik takin awm ila, tun 2022 Christmas bak hi MNF sorkar hnuaiah kan hmang tawh dawn lo. Congress party zawm thartute pawh Congress party tan mai ni lo, ram leh hnam tana rinawm taka hnatha thawk turin ka sawm che u a ni,” a ti a. Congress party mipuite leh party chhuahsantute pawh ram tha siam tura lo kir leh tura sawmin, “In tan hmun a awm e. Kan ngen che u, ram tha siam in duh a, in tlin tih kan hria, Sorkar tha i siam ang u. Congress Party-ah hian in mikhual ve dawn lo,” a ti bawk.
MPCC Vice President Lal Thanzara pawhin thu sawiin, “Congress party hi Kristian sakhaw humhalhtu, hnam tlem zawkte humhalha chawikangtu a ni a, a dintu pawh Kristian pachal a ni. Mizorama remna leh muanna, Mizoram buaina chin felna tura Pathianin a thlan chu Congress party a ni. Mizoram ro thil pawimawh – Hydel Project, Railway, te bakah MNF party in a pamtul tawh Referral Hospital tungdinga Medical College thlenga din a, Airport tangkai dintu chu Congress party a ni. Congress party hi a chhelai siamthatu a ni,” a ti.
Lalthanzara chuan, “MNF party hi Independence sual a, Chhuti la awmchhun a ni. Zalenna sual tam tak an tlawm lo, a tlawm awmchhun ten tunah MNF an kalpui. An sorkar ve hnuah hel an inlar a, ram a ralmuang lo. Roreltute hi Pathan ruat a nih kan pawm, MNF te hi ni tha lo a roreltu atana Pathian ruat an nih kan pawm. Congress chuan ‘kan ti ang’ kan tih apiang kan ti thin. Mizoram mipuiten in leh lo tha kan neih theih nan Rangva kan sem a, NLUP tanpuina pawh kan tiam angin kan pe mai. MNF in cheng nuai 3 tiamin, Rs. 25,000/- an sem thei hram a. An hmalakna tha lo tak vangin hnawlin an awm mek a, Hnam Runah an duh anga awm lo leh an duh hmu lo beidawng tam tak an awm tawh avang leh an laka Mizoram mipui an beidawn tawh avangin an tla ngei dawn a ni. Healthcare a inziak lut mipuite pawisa chawi pawh thawktute hlawhah an hmang daih a ni. Sorkar kal ta Congress sorkarin tuna MNF sorkar tan hian vaibelchhe tam tak ram hmasawnna hna thawhna tur a hnutchhiah a. MNF sorkarin sorkar awm leh tur tana a present awmchhun chu leiba a ni,” a ti bawk.
“ZPM party chhungah buaina tam tak a awm a, tunge Chief Minister tur rin harsa khawpin an buai a. ZPM hian sorkar tha siam aiin engti kawng pawha sorkar hrim hrim hi an tum ber a ni,” a ti bawk.
He hunah hian MPCC President Pu Lalsawta chuan kum 2023 General Election lo awm tûrah Siaha biala Congress Party Candidate tûrin Pu N Chakhai MCS(Rtd) a ni tih a puang a, a tlin ngei theih nân theih tawp lo chhuahpui a, Congress Party-in Sawrkar ṭha siam a tumna kawnga phur taka hma lo la tûrin MARA Mipui te a sawm bawk a ni.
He hun hi TT Vakhu, Vice President, MDCC in a kaihruai a. Revd. T. Salaw, Moderator, ECM Assembly, Siaha in hunserh a hmangin S. Hiato, President, MDCC, Palak bialtu MLA KT Rokhaw, R. Lalrinawma GS MPCC leh Pu H. Malvina, CEM MADC-ten thu an sawi bawk.
