National Wildlife Week hi kum 1954 atang khan kumtin India rampum huapin October ni 2 atangin ni 8 chhungin hman thin a ni a, kumin hi a vawi 68-na a ni. Mizoram ah chuan a lawmna pui ber hi October ni 3, 2022 khan Assembly Conference Hall, Assembly Annexe-ah hman a ni tawh a. Environment, Forests & Climate Change Minister Pu TJ Lalnuntluanga chuan khuallian niin a hmanpui a. He Wildlife Week pual hian ni 30.9.2022 khan HS/HSS level leh College level pualin Painting Competition, heng thupui – ‘Compassion to Wildlife’ tih leh ‘Climate Change and Save Wildlife’ te hmangin neih a ni bawk. National Wildlife week, 2022 puala hmalakna hi Forest Division leh Forest Range te pawhin an remchan dan angin an hmang bawk a ni.
Vawiin khan he 68th National Wildlife Week, 2022 kharna leh Consultative Workshop chu Chief Wildlife Warden Conference Hall, MINECO, Aizawl ah buatsaih a ni a, he hunah hian Mizorama kohhran hrang hrang, NGO leh Print/Electronic Media aiawhte sawm an ni a. Week kharna inkhawm hi Pu Liankima Lailung, IFS (Retd) in kaihruaiin Pu R. K. Singh Principal Chief Conservator of Forests & Head of Forests (HoFF) in Keynote address a sawi a. He Consultative Workshop-ah hian Pu Lalnunzira IFS, DCF (WL) Aizawl & Field Director, Dampa Tiger Reserve in ‘Mizorama Nungchate dinhmun’ tih thupuia hmangin presentation ngaihnawm tak a pe a. Rev. Dr. L.H.Rawsea (Aizawl Theological College) chuan ‘Thilsiam dangte nena Pathian biak ho’ tih thupuia hmangin Presentation tha tak a pe bawk a ni. Chawhnu lamah Pu A.C. Zonunmawia, Co-ordinator, Centre for Environment Protection (CEP) in ‘Role of Media and NGOs in Wildlife Conservation’ tihthupui hmangin Presentation a pe bawk.
Mithiamte paper presentation neih hnuah hian Mizoram a Wildlife Conservation chungchangah sawihona hun tha tak hman niin Mizorama Wildlife Conservation chungchangah ngaihdan hrang hrangte zau takin sawiho a ni a. Vawiina sawihona engah rawtna siamte leh hmalakna zel dan tur kawng hrang hrang tarlante chu EF&CC Department nena thawkho chungin hma la chhunzawm zel turin Workshop kalkhawmten an rel a ni.
