Vawiin December ni 2, 2022 hian Golden Hall, Congress Bhavan-ah MPCC Friday Political session neih a ni a. Rev. J. Chalhlira, Secretary in a kaihruai a, report hrang hrang ngaihthlak a nih bakah Lal Thanzara, Vice President-in thu a sawi bawk.

Lal Thanzara chuan Mizoram tana Congress party hnathawh pawimawh zia sawiin, “COVID-19 a lo len laia India ram hmun hrang hrang atanga Mizo awmte a huho a tluang taka an lo thlen theihna chhan kha Congress sorkarin rel kawng lian chi a lo siam vang leh Lengpui Airport a lo siam vang a ni a. COVID-19 vei tam takte kan enkawlna Falkawn Referral Hospital-te pawh kha Congress zara Mizoramin kan neih a ni. A hlutzia hi mi tam takin kan hre lo maithei, mahse, a chhut chiang duh tan chuan hriat loh theih a ni lo,” a ti.

MNF leh Congress sorkar khaikhinin, “Congress Party-in kan tih chu kan ti hlawhtling zel a, MNF-in kan ti ang an tih chu an ti hlawhtling ve ngai miah lo thung. Kawng chhawng kan siam ang an ti a, a bul pawh an la tan lo a, Aizawl khawpui hi Traffic Jam awm lohna khawpuiah kan siam ang an ti a, PAHOSS an sem chiam a, mahse, vawiin thlengin traffic jam a la reh phah lo. Assam Rifle chhuah hun tur an sawi pawh engmah a dik thei lo. Kuhva ro supply an ti tawp thei miah lote hi an hotu lawkten chanvo an neih ve tlat vang a nih ka ring tlat. Sethawnah Ruihhlo ngaite enkawlna lian ber kan siam dawn an ti a, ruihhlo dona lamah hmalakna an nei mumal leh si lo a, Mizoram chu Drugs hmunpuiah a chang chho mek a, Drugs in kan thalaite a suat mek a nih hi,” a ti.

Congress Party-in sorkar theihna chance tha tak a nei tih sawiin, “Kan President Pu Lalsawta, mi hmingtha em em hi mipuiin a ACR an en a, an ring a, an duh tlat. Pu Zoramthanga ACR erawh chu an duh lo a ni mai lo, an nuih a za tlat zel. Pu Lalduhoma ACR pawh a hnawk a tam lutuk a, a sena inziak a tam bawk si a, mipuiin an ring zo tak tak lo. Tunah hian Congress Party aia sorkar siamna chance nei tha an awm lo, inlungrualna nena kan kal zel a, ‘chakna ni lovin, thiltih theihna ni lovin, ka thlarau zawkin le’ kan tih ngam chuan kan sorkar leh em em ang. Candidate list a kan tel avanga kan party hmel a bal dawn a nih ai chuan kan ding lo ngam mai tur a ni. Thangthar mi tha tak takten keimahni kan la awm ve vung avanga kan Party a an beisei ang hmu lo tur anga an in ngaih dawn chuan engkim hi kan surrender ngam mai tur a ni,” a ti bawk.