Tukin April ni 20, 2023 Ningani zingkar khan Tawnluia, Dy.CM leh MNF Sr. Vice President ni bawk chuan Ramhlun North Community Centre sak mek a tlawh. Dy.CM chuan Ramhlun chu Aizawla Veng lian leh veng hlun, mihring pawh tamna, veng changkang a ngaih a ni a. Community Centre an nei thuai tur chu a lawmpui thu a sawi.
Tawnluia chuan Ramhlun North chu Venglian zinga a ngaih pawimawh a nih avangin harsa chung chungin Community Centre sak hi an duang chhuak tih sawiin, ‘Ramhlun North mipuiin an hman tangkai tur vantlang hmun neih tha kan ti si a, Ramhlun N hi priority kan pek a ni. Hemi rual hian Bungkawnah kan sa mek bawk’ a ti.
Pu Tawna chuan Hall lian chu sak chhung a rei a, veng mipuite pawh an dawhtheih a ngai a. Consultant leh Contractor ten tha thei ang berin an siam ang tih a ring tlat tih sawiin, ‘hna phuailuai hi ka duh loh ber a ni. Vantlang hmun tur a nih avangin a tlo thei tur ang bera sak a ngai’ a ni a ti.
A sawi zelnaah Dy. CM chuan Mizo te chu inkawmkhawm let let, Vantlang intawm tur hmun mamawh kan ni a, chutiang ang hmun Ramhlun North khawtlangin an nei tur hi a tangkai dawn hle a. He Centre hi state sum liau liaua thawh a ni a. A bul (phase 1) kan tan zo a, Sum dapkhawm chawpa thil tih a tul thin a, phase 2 kan tan leh nghal dawn a ni. A bul kan tan fel tawh vangin hawn theiha peihfel a nih thuai kan beisei a ni a ti.
UD&PA Minister chuan khaw 28 ah hma an la mek tih sawiin, MNF Sorkar hian mipui vantlang tana tha tur thilah chuan theihtawp a chhuah mek a ni a ti. “Khawtlang hruaitu ten ruahmanna leh rawtna an rawn thlente pawh ngai pawimawh zelin, tlawmngai pawlte nen inrawnkhawm chungin UD&PA department chuan hma kan la thin a. Sorkar nih vang ngawtin duh dan danin hma kan la ngawt ngai lo a ni” a ti.
Pu Tawnluia chuan ‘SMART City hnuaiah cheng vaibelchhe 500 in Aizawl khawpui cheithat nan thawh mek a ni a. SIPMIU kaltlangin Tanhril hnuai Setlaklui, tuna Aizawl khawpui tuilak aia tam zawk pump chhoh kan tum mek a, kan zo fel tep tawh a ni. UD&PA hian mipui mamawh chi hrang hrang, tun hmaa department dang khawih thin ho te pawh hma tel vekin theihtawp kan chhuah mek a ni’ a ti.
Ramhlun North Community Centre hi Mizoram state fund atanga thawh niin, sak zawh nan sum sen ngai zat tura chhut hi Cheng nuai 778.72 vel a ni. He building-ah hian Chhawng nga (G+4) awmin – car parking, two wheeler parking, chowkider quarters, restaurant, health sub-centre, meeting room, local council house, conference hall, Badminton hall cum community hall te awm tura duan a ni.
Tukina Ramhlun North Community Centre sak mek tlawhnaah hian R. Rohmingliana, MNF National Core Committee member, Tawnvela, Adviser, MNF Gen. Hqrs., Ramhlun North Local Council hruaitute leh UD&PA hotuten an tawiawm a ni.
