Lunglei.5th.June.2023: Vawiin chawhma khan Lunglei Dist Congress Comtt ( LDCC) chuan Party Office ah chhung inkhawm neiin inkhawm hi V.Lalrinsanga General Secretary in a kaihruai. Chhung inkhawm a thu sawitu LDCC President K.L. Chhawnzauva chuan Congress kan sawrkar chuan kan MLA te khalh ngila vengtu tur thuneitu hran kan mamawh ve lo, Kohhran te duhdan leh an zai ngaia kal hi a tha mai a ni a ti.
Sawrkaar ṭha leh rintlak siam turin a hotu ber an pawimawh a, lui pawh a hnar a fim a, a thianghlim phawt loh chuan a mawng lam aṭangin a thianghlim thei lo a ni. Kan Rama Political Party te han en hian tunge rintlak ber ang tih chu sawi tam vak ngai lovin kan leader te mizia leh nih phung en hian a Chiang mai a ni tiin, tuna kan ram mamawh leh kan tuihalna ber chu sum leh pai tam tak leh hmasawnna ropui te aimahin, dikna, rinawmna leh taihmakna te hi a ni, chutiang taka kan ram hruaia min din chhuahpui tur awiawm taka thusawi thiam mai ni lo, a taka thawk tak tak tur kan mamawh zawk a ni a ti.
Kan ram neih leh mipuite hmanga khawvel ram dang hmasawn leh changkang te ruala, ke pen ve thei tura beiseina nghet tak nei tlattu, Pu Lalsawta hi ram mipuite tan innghah ngamna a ni LDCC President chuan a ti.
Inthlan hun a hnai zela rulling Party tan phei chuan a hnai zual bik a, therhlo leh mahni mimal hamṭhatna an inchuh nasa em em a ni tiin, Opposition Party tan pawh inthlan lo awm tura hnehna chang turin nitin hi a pawimawh tawh a ni a ti a. Inthlanpui lo awm turah Party pakhatin min enchhin rawh u an ti ṭhin a, enchhin pawh an sawi mawi nasa a, ram hruaina kawngah hian tute emaw enchhin ringawt hi thil finthlak a nilo a, ram hruaitu atan Party ah tunge an hotu ber ngaihtuah ila, tun dinhmunah chuan Party dang President te ai chuan Congress Party President Pu Lalsawta hi rinawmna, taihmakna leh dikna kawngah belhchian dawl ram hruaina kawnga sulhnu tam tak lo nei tawh hi a ṭha ber ang K.L Chhawnzauva LDCC President chuan a ti. Mizoram mai bakah Central lamah pawh Congress Party boruak a lian zela rampum huapa Sakhaw zalenna a awm zel theih nana BJP sawrkar paihthla tur chuan Congress Party a la ṭha ber tih LDCC President hian a sawi bawk.
