Aizawl, 8th. June, 2023 : General Administration Department (GAD), Govt. of Mizoram bultumin GAD, Association for Voluntary Blood Donation (AVBD), Mizoram leh Central YMA-te thawkho chuan June 30, 2023-a Remna Ni pualin June 2023 thla chhung zawngin thisen pek rûnpui kan huaihawt mek a. He thisen pek rûnpui hi June 1, 2023 khan Chief Minister Zoramthanga’n Dawrpui Multipurpose Hall-ah a hawng a ni.
Remna Ni puala thisen pek rûnpui kal zelah GAD, AVBD leh Civil Hospital, Aizawl Blood Bank-te chuan vawiin June 8, 2023 hian Secretariat tualah blood donation van pahnih hmangin blood donation camp kan buatsaih a. Mi tlawmngai mi 29-te’n thisen mamawhtute nunna chhanna atan an thisen hlu tak an pe a, petute hi mipa 27 leh hmeichhia pahnih an ni. Tlawmngai taka thisen petu zawng zawngte chungah a huaihawttute chuan lawmthu an sawi a.
“Kumina Remna Ni puala thisen pek rûnpuiah hian thisen pe turin Mizoram mipui kan sáwm a, Mizorama blood bank zawng zawngah Remna Ni pual hian thisen pek theih a ni. Remna hlutzia hria a, mite nunna chhan nan leh mi dangte tana malsawmna ni tura thisen pe zel turin mi zawng zawng kan sâwmin kan ngen e,” an ti bawk.
