Tunhnai hian AAP Mizoram chuan hmun hrang hrang a Sawrkar Sikul an tlawh kual mek a, tunkar khan Aizawl South III leh Serchhip District Sikul thenkhatte an tlawh leh a ni.
AAP Mizoram-te chuan Zirna hi kan ngai pawimawh hle a, ram hnuk khawih thil a nih avang leh, ram hmasawnna atan a pawimawh berte zing a mi a nih avangin Mizoram a chengtute pawh hian kan ngaihven a ngai a ni.
AAP Mizoram Vice President C. Lalkhuma chuan, “Tuna kan sawrkar Sikulte hi neitu nei lo ang mai in an kal mek a, zirna In a chhiat em em rualin zirna quality pawh a chhe hle a ni,” a ti. Sawrkarna chelhtute’n zirna a tha an tih chhan hi a hmun a kal ngei ten kan hrethiam lo a, eng angin nge zirna tha an teh tih hi kan hre duh a, a changtu Minister emaw a bialtu MLA-te hian kum tin sawrkar zirna in hi vawi 2/1 tal pawh tlawh se hma kan sawn phah ngei ang a ti bawk.
Sawrkar Sikul a lut naupang tam zawk hian future an neilo a, nakin lawk a kan ram chawk buaitu an la ni thei tih kan hriat a tul em em a ni. Mizoram a naupang awm zawng zawngte zirna tha pek hi sawrkar mawhphurhna a ni a, hun tlemte an neih chhung ngei hian he an mawhphurhna hi hlen ngei turin sawrkar kan phut tlat a ni.
Tuna kan MLA neih zingah kum 1 a an MLA fund atanga zirna lama nuai 15 aia tam hmang mi pakhat chiah a awm a, hei hian tuna kan ram hruaituten zirna an ngaihthah zia a tilang chiang em em a ni.
Tunah hian kan hma a sawrkarna chelh tawh ten a zirna an ngaih pawimawh loh rah kan tel mek a. Thalai hna neilo leh ruihhlo ngai an tam em em chhan pawh tunhma a zirna kan ngaihthat avang a ni. Hetiang reng a Mizoram a kal hi keini AAP chuan kan phallo a, kan sawrkar a nih ngai chuan Delhi Education Policy hmangin Mizoram a Zirna kan siamtha ang.
