Vawiin khan St. Joseph HSS, Aizawl chuan kumina HSSLC result ṭha tak an neih lawmna hun Vanapa Hall-ah an nei. Result lawmna hi Pu Lalnunmawia Chuaungo, IAS (Rtd.), Chief Information Commissioner-in khuallian niin a hmanpui a. Zirlaite chu zirna leh kawng engkimah lum chuan luma vawh chuan vawh law law tur, tiin khuallian chuan a chah.
“Khawvel nuna zawm tur chu engkimah, zirna, eizawnna leh rinna ni se, kan kalna lamah lum chuan luma vawh chuan vawh law law tur a ni. Tumruhna leh tih hram hramna hi kan nunpui tlat tur a ni,” Pu Lalnunmawia Chuaungo chuan a ti a.
Khuallian chuan zirlaite chu an inchhir loh nan an thawh theih zawng zawngte thawka inchhungah engkim ti turin a chah a, “Zirna kan ngaipawimawh hmasa ber ang a, kohhran leh khawtlanga inhmannain zirna a tibuai tur a ni lo,” tiin IAS retired chuan a fuih.
“Tunlaiah nula tlangval mahni ina eirawngbawl thiam lo, nu leh pain pawhin an tihtir lohte an awm. An tihtir loh che u pawhin ti rawh u, mipuitlinga inchhuaha tur a ni. Inah in tih theih ang tawk hna zawng zawng thawk rawh u, tih tak takin engkim ti ula in inchhir lo vang. Tuarchhelna leh puitlinna kawnga min hruaitu a ni,” Pu Lalnunmawia Chuaungo chuan a ti.
Education tum ber sawiin, “Ram, khawtlang, mahni leh chhungkua tana chhenfakawm nih hu zirna tum ber a ni,” tiin a sawi.
Central Service lama Mizote tlin kan harsat tak avanga zawhna tam tak awmah zirna mawhpuh a nih ṭhin thute sawiin, zirna chu khawvel khawi hmunahmah sawiselbo a awm lo tih a sawi a. Sorkar lama a hnarkaituten ruahmanna an siam fel a ngai tih Pu Lalnunmawia chuan a sawi. Chumi atan chuan rawtna thlen tam a ngai tiin, zirlai naupangte chu sorkara zirna ṭhatna tur rawtna thlen ngam khawpa huaisen turin a chah.
St. Joseph HSS, Aizawl hian Class 11-12-ah hian Arts, Science leh Commerce neiin, a pathumah hian kumin result-ah Top Ten an nei a, Top ten 15 an nei tling a ni. Vawiina function hi Dr. Sangthankima’n hunserh hmangin bul ṭan a ni a, Principal Pu C. Laltlansanga’n a kaihruai a ni.
