ZPM Thalai leh ZPM Zonu te chuan, “MzSRLM hnuaiah District, RD Block leh Village tinah Self Help Group (SHG) 9,200 awm tawhin chutah chuan SHG hmeichhe member 74,000 an awm mêk a, tunah hian khaw tinah SHG pakhat tal awm tawh ang a chhut a ni bawk. Hmeichhiate hamthatna turin F.Y hmasa zawk 2022-23 khan SRLM hnuaiah Annual Action Plan (AAP) atan Rs. 174.13 Crores approved a ni a, nimahsela Mizoram sawrkar hian 1st
installment Rs. 39.18 crores chiah a hmang a ni. Heta lang chiang reng chu, SHG hmasawnna atan sum tamtak awm hi hman lohin a luang ral thin tihna a ni. SHG hmeichhiate hamthatna tur sum hetiang taka a riral hi pawi kan ti a, an tan sum tam tak dah a nih laia hman theih tura ruahmanna a awm lo hi hmeichhiate ngaihthahna ah kan ngai a ni,” an ti.
Vawiina joint press conference an neihah, “F .Y 2017 atanga vawiin thleng hian Annual Action Plan total budget atang hian 1st installment/25% bak sum
hi hman a ni ngai meuh lo tih a thuphungin kan hria a, sawrkarna lo chelh tawhtu MNF leh Congress-te hian
hmeichhiate hamthatna tur an ngaihtuah tawk lo niin kan hria. Heng sum tam tak approved tawh hi tangkai taka hman ni ta se chuan tun aia nasa daih hian kan Mizo hmeichhiate hian hma kan sawn ngei a rinawm. He thil hi Union Minister pawhin ngai pawimawhin, Mizoram Chief Minister pawh he thil chungchangah hian lehkha a thawn hial a ni.
“SHG hmasawnna tan hian Farm, Non-Farm leh Financial Inclusion Activities hrang hrangte hmang hian training leh an mamawh hrang hrang-te pek thin an ni a, SHG hmeichhe member khawsak harsa zual tan phei chuan SHG hi khawsak theihna leh innghahna ber a ni. ṭhin. Hmanni lawka Bungtlang South R.D Block a R.D Rest House MzSRLM hnuaia sak te pawh kha thil fel lo tak a ni a, MzSRLM hnuaiah hian SHG ten an
hman tangkai theih tur thilte a nih ngawt loh chuan sum hi thil dangah pawh pen theih a ni lo.
“SHG hmalakna hrang hrang te hi tha leh felfai taka kal tur chuan viltu leh enkawltu tur staff awm that a ngai
tih a chiang reng a, hetih lai hian tunah hian staff awm tur zat 469 atangin mi 271 (58%) chiah Mizoramin
staff kan nei mek a ni. SEDP Board phuahchawpah Board Vice Chairman MLA ni lai leh staff an awm thluah
theih lai a, SHG enkawltu tur staff kan nei mumal leh si lo hi MNF sawrkar hnuaia hmeichhiate hmasawnna tur rahbehna lian takah kan ngai a ni.
“MNF sawrkar chu tun ai hian hmeichhiate hamthatna tur kawngah ngaihtuahna seng turin kan ngen a.Sum
tam tak approved tawhsa a awm laia, hman loha a luang ral hi a changtu minister Pu Lalruatkima dawngdah vangah kan ngai a, Assam Rifles insawn chhuah chungchanga an atta nuaina leh kelsa kanna bel nena Assam Rifles-te’n lammual an chhuahsan tawh ang a uar taka dawt sawitu minister hian, a
department chanpuala hmeichhiate hamthatna tur sum luangral hi a hre lo em ni? Tih hi Pu Lalruatkima
hnena kan zawhna a ni. Sum tam tak approve sa a awm laia, hman loha a lo riral mai thin hi pawi kan ti a, a mipui nawlpui hlawkna tur ni mah se, MNF sawrkara a tithei zualpuite’n an lo ṭham ṭhen ve theih lohna leh an tâna hlawkna tur awmve lo thilah hian MNF sawrkâr hian a ring a rawlh peih vak lo em ni?
tih hi kan zawhna a ni. He thil hi hmeichhiate rahbehna leh hmusitna ah kan ngai a, a changtu minister Pu
Lalruatkima hnenah lehkha kan thehlut dawn a ni,” an ti bawk.
