Vawiin June ni 18, 2023 hian MPYCC President Laltawnliana chuan Manipur buai avanga Zo hnahthlak thahnem tak an chenna in chhuahsana chhawmdawlna hmun (Relief camp)-a awm mekte chhawmdawlna tur; ni tin mamawh chi hrang hrang thahnem tak Manipur-a phurh luh tur Indian Youth Congress (IYC) & MPYCC Relief Team chu Congress Bhavan atangin a vai liam.
Congress Thalai President Laltawnliana’n Manipur kal turte a vai liam hma hian thu sawiin, ‘Mizoram Congress-te hian kan Zo hnahthlakpui te hi engtik lai mahin kan en hrang ngailo a. Congress Thalaite hian thla hmasa khan Thingdawl leh Rengtekawna Manipur atanga kan Zo hnahthlak rawn ral tlante tanpuina pein kan lo tlawh tawh a, a theih ang anga tanpui zel kan tum bawk a ni,” a ti.
Indian Youth Congress (IYC) chuan Naktuk June ni 19, 2023 khi Rahul Gandhi piancham pualin, State hrang hranga Youth Congress-te chu midangte tanpuina ni atan hman nise an ti a.
He ni denchhen hian IYC leh MPYCC chuan Manipur buai avanga Zo hnahthlak thahnem tak an chenna in tlan sana Relief camp-a awm mekte tanpui ni se tih a ni a. IYC leh MPYCC hian Relief camp-a awm mekte ni tin mamawh tur chi hrang hrang bakah; damdawi thahnem tak Manipur-a phur lutin Indigenous Trible Leader Forum (ILTF) hotute kutah hlan a ni ang.
Manipur-a chhawmdawlna hmuna awm mekte chhawmdawlna pe tur hian IYC Secretary Mizoram & Manipur In-charge Sarifa Rehman bakah, MPYCC General Secretary HP Lalchuailova hovin MPYCC hruaitu engemawzat leh chanchinbu mite kalin, tanpuina hi naktuk June ni 19, 2023 Rahul Gandhi pianchama hlan hman tum a ni.
Dr.Lalmalsawma Nghaka Treasurer MPCC in a kal tur team te hi ṭawngṭainain a thlah liam a ni.
