MPCC chuan thuchhuah siamin, “Sorkar thuchhuah danin June ni 18, 2023 (Pathianni) chhun khan Chief Minister Pu Zoramthanga leh Manipur Chief Minister N. Biren Singh te phone hmanga inbia in, Manipura buaina awm a reh thuai theihna tura hmalak chungchang an sawi dun nia tarlan a ni a. May ni 3 atanga Meitei ten Manipura kan Zohnahthlakte chunga buaina nasa tak an siam tirh lam khan Manipur Chief Minister N.Biren Singh hian Mizoram Chief Minister Pu Zoramthanga pawh be duh loin, a phone call pawh a chhang duh lo hial tawh a. Rapthlak tak leh rawva taka Zohnahthlak te chunga an chet hnua hetia phone call hmang maia inbiakna kalpui a ni leh Manipur Chief Minister ngenna ang ang lo pawmpui duak duak hi Mizoram tan him lovah Congress Party chuan a ngai a. Chief Minister Pu Zoramthanga hi Mizoram leh Mizo hnam zahawmna humhim tura Manipur Chief Minister Biren Singh-a bawl kual vel mai maia awm lo turin kan ngen a ni.
“Hetia pawnlawi taka state 2 Chief Minister te an inbiak mek laia All Assam Manipuri Youths’ Association-in kan state a rorellai MNF party an vau ngam hi a phenah Manipur Chief Minister a awm Congress Party chuan a ring a. All Assam Manipuri Youths’ Association (AAMYA)-in June ni 23 atanga Assam leh Mizoram inkalpawhna kawng tiamchin awm lova danchah an tum HSA (Hmar students’ Association – Assam Hills) leh NCHISF(NC Hills Indigenous Students’ Forum) te hmalakna vanga thulh a ni chu lawmawm kan ti takzet a, heng pawl pahnihte (HSA leh NCHISF) hmalakna hi chhuanawm kan ti hle bawk.
“Tunlaia BJP sorkar chet dan hi sakhaw dang vuantute leh hnam tenau zawkte chimral tumna tih a chiang a, hei hian India Democracy lungphum a sawinghing mek a ni. Heng avang hian Mizoram tana kan thawhpui NGO te, Political Party leh Kohhran zawng zawngte pawhin kan ram, kan hnam leh kan sakhua chimral tumtu leh nekchep tura hmala mektu BJP hi nasa zawka huaisen taka do zel turin kan ngen bawk a ni,” an ti.
