Social activities hriat hlawh tak Vanramchhuangi (Ruatfela Nu) chuan thuchhuah siamin, “Mizorama lui hrang hrang, mihring leh thlai, ran leh ramsa, lui nungchate tana ei tlak lo khawpa a nut chhan chu-National Highway & Infrastructure Development Corporation Limited (NHIDCL) kawng laiin dan loa an kawng laihna vung kawng thlanga an nawr liam vang a ni.
“Tin, Aizawl khawpui chawmtu Tlawng lui nut chhan hi state sawrkar hmalakna
link road laihna leivung dan loa paih vang te, hmasawnna hna hrang hrang
thawhna leivung leh bawlhhlawh paih vang te, insakna hnawmhnawk bakah
mimal leh dawrkai bawlhhlawh a ruka lui kawr leh Tlawng lui fintu luitea paih
vang te a ni a. Chutianga dan loa leivung leh bawlhhlawh paih chu ruah a surin
Tlawng luiah a lut khawm vek a ni.
Aizawl khawpui chawmtu, Tlawng lui nut vanga tui a pump theih loh vangin
furpuia kan lui tui a tam em em laiin tui ṭamin kan ṭam mek a ni.
“Mizoram luite hi fur ruah sur vangin in tlak loh khawpin a nu ngai lo a, a
finfiahna video clip, hmun hrang ranga mi kan nei a. Tin, 16. 06 2023 a
Mizoram lui ṭhenkhat nut zawng an tehna atang pawhin NHIDCL kawng laihin a khawih phak loh luite a nu nasa ve lo tih chiang takin a lang bawk a ni.
NHIDCL kawng laihna hmun- 99.9% ah kan lui kawr leh luite (seasonal leh
perennial river) te an kawng laih vungin a chhilh vek avangin ruah surah an
kawng laih vung chirha chang ta chu kan lui lian major river zawng zawngah a
luang lut a, kan lui liante chu leivung leh bawlhhlawh (siltation)-a a khat vangin
kan lui tuite hman tlak lohin a bawlhhlawh phah ta a ni. Tunah Tuivawl luiin a chawm, Saitual leh a chhevel khuate chuan 19 May atanga khan Tuivawl nut vanga a pump theih loh avangin tui supply an hmu tawh lo a, a rethei a hausain tui an lei ngat ngat a ni.
Chuvangin kan lui tui hi mihring tih bawlhhlawh ngei a nih avangin a ti
bawlhhlawhtute chu tute nge an nih tih chhui chhuah a nih a, dan anga an
chunga action lak a nih theih nan, Chief Judicial Magistrate (CJM) hnenah chhui
phalna ka dil dawn a. Kan lui tui nu vanga tuartute tawrhna a nasat em avang leh a tuar mipui kan tam lutuk vangin min phal sak ngei ka beisei a ni,” tiin a tarlang.
