June ni 19, 2023 (Thawntan zan) dar 9:00pm khan Chief Minister Pu Zoramthanga bial, Thuampui MNF Unit-1 huaihawtin MNF Treasurer K.Vanlalauva, Ex-Minister chuan mi thar lawmluhna hun Pi Ramdinthari Inah a nei a, party hrang hrang Congress-22, Neutral-15 leh ZPM atangin voter 3, a vaiin MNF zawm thar mi 40-te chu MNF-ah a lawmlut. MNF-ah mithar bik an awm loh thu leh MNF chu Mizo zawng zawngte ta anih thu a sawi. Chief Minister Pu Zoramthanga chu Manipur Chief Minister nen inbiak a tul avanga Chief Minister aiawha kal leh mi thar duhawm takte chu lawmlut anih thu a sawi a. Pu Zoramthanga chu Pu Laldenga khan a hriat chian leh zual hnuah a mi rin zawng tak a ni, a ti.
Chief Minister Pu Zoramthanga chu tun hmaa Mizoram leh hnam tan zalenna sual (underground) hun laia inkawp nasa ber an nih thu leh, kha tih hun lai atanga vawiin thlenga hruaitu tha leh ropui, mi rintlak em em a la ni reng tih chu kalkhawmte hmaah a sawi. ZPM chu Lunglei lamah an thawm a len hle ruala an mi leh sa, mi pawimawh tak takten an bansan chur chur mek thu te, tun hnaiah bial tam takah MLA candidate an puan dan chu anmahni party chhungkuaah pawh firfiak taka thuneihna kalpui an nih dan leh an lungrual lohzia a sawi bawk.
ZPM leader Pu Duhoma hian Pu Laldenga kha a boral laia a thusawiah, Pu Laldenga anga leader tha Mizo zingah an awm lo tih a sawi kha a sawi chhuak leh. Pu Duhoma khan MNF a rawn zawm ve lai khan, “Kei chu thusawi mi ka ni a, nihna pawh min pe suh u,” a ti a. Mahse reilote a rawn awm a, a nihna thar General Secretary chu hmang thiam lovin high command engemaw zat a lo thunun hman a. MLA candidate turin mi tam tak a lo tiam hman a, MNF dik tak chuan khatiang thil tenawm kha kan ti ve ngailo, MNF Treasuser chuan a ti.
ZPM constitution bung 11:11 chu ZPM hotuten an bawhchhe nghal tiin, an MLA candidate puanah an Vice President leh Treasurer an tel loh thu a sawi. ZPM kalphung chu a bul atanga a kal dik loh hle thu te, candidate 35 zet a nghet ni lo, an ti mai mai an tih rualin Val Upa Council-in vawiin khan an nemnghet leh vek tho si kha mak tak a ni, a ti bawk.
Tunah hian Pu Lalduhoma tactic bawlhhlawhchhia Mizoramah a len mek thu sawiin, politics khawvelah mi hlauhawm ber chu thusawi thiam, Pu Lalduhoma ang mi rinawmlo hi an ni a. Mahni party din ngei pawh kalsan zung zung thin Pu Duhoma hruai ZPM hi mi rinawm lo kalkhawm, party hrang hrang atanga tlantau kalkhawm an ni, a ti bawk.
Hetiang hi ZPM kal dan anih avanga MNF Treasuser chuan ZPM chi khat a pian a leh thuai a rin thu a sawi a, an buai em em mek tih sawiin, hei aia an la buai dawn chauh a rin thu a sawi bawk.
Lawmluhte atangin thusawi ngaihthlak a ni bawk. He hun hi Zosangliana Khiangte, MNF Aizawl East-1 South Block President chuan a kaihruai a ni.
