Vawiin June ni 20.6.2023 (Thawhlehni) hian Mizoram Pradesh Congress Committee chuan Vanapa Hall, Aizawlah Aizawl khawpui chhung Congress party intuaitharna leh mi thar lawmluhna hun hman a ni a. MPCC President Lalsawta chuan Lalnunmawia Chuaungo IAS (Rtd), Lalbiakzama MPS (Rtd), F. Laldingliana MCS (Rtd), Vanneihthanga Vanchhawng, Investigative Journalist, Lalremruata Renthlei, News Editor, The Aizawl Post, Eric F. Zomuanpuia, G/S Chhimbial Chhantu, Lalchhunga LC Sofa, Pu Laldingngheta Advocate, Lalnilawmi (Former Chief Manager, SBI), Merium L. Hrangchal (Vestige) te leh Block huamchhung Unit hrang hrang aṭangin mi 772 a lawmlut nghal bawk.
MPCC President Lalsawta chuan, Pathianin Congress Party min hruai tih sawiin, Ram siamtha tura kan mi sawm te, khelhfuh tum lo, Politics a tih fuh tum lo, kan hnena an lo kal chhan chu Congress-in hna Mizoram tana kan thawhpui theih tura an rilru siamsaktu chu Pathian a ni. Pathian hnenah lawmthu ka sawi a ni, a ti.
Lalsawta chuan, “Ram enkawl chungchangah sorkar tha a pawimawh. Mizoramin harsatna kan tawhin Mizo zia a lo lang thin. Hripui len lai pawhin chhim leh hmar a mite’n kan tlakchham hlauvin midang harsatna pui tur te, an mamawh phuhruk turin an in pe a, mi tam tak mamawh chhanna an ni a, mi mangang tanpuitu an ni. Mipui leh ram tha Pathianin min pe a, sorkar tha siam turin kan thei a, kan tlin, chu chu Congress party in kan tum a ni.
“Election Commission of India chuan inthlanah MLA Candidate te sum hman tur a ruahman a. Kohhran in sum seng lo turin min ngen bawk. Inthlanna thianghlim leh tha nei turin min vil dawn. Sum seng tam ten sorkar huna mipui sum an lak then leh tur ni lovin, keini chuan sum ni lovin Pathian lam kan hawi a ni. Kan sorkar leh kar loh chu Pathian thu thu a ni. Party thenkhat chu inthlan behbawmah an lungti muangtu chu sum a ni a. Keini chuan sum kan nei lo, Candidate-te mi hausa ni lo mahse mi tha, mi dik leh rintlak an ni dawn. Mizoram tana sorkar tha siam turin Pathian lam kan hawi a. Keini hi mahni aia ram dah hmasa turin Pathianin min ko a ni tih i hria ang u, tih sawiin, keimahni ngeiin kan ram hi kan siam dawn a, nakin atan kan nghakin kan dah thei lo, tunah a ni kan tih dawn. Kan tihphung pangngai hian kan ram hi a danglam dawn lo, tih danglam a ngai, tiin ram tana danglamna siam turin an lo kal a ni,” a ti.
Lalsawta chuan, “India ramah sakhaw zalenna nasa taka rahbeh a ni a, Christian te leh hnam tenaute kan chep, tih sawiin, kan ram leh hnam, kan sakhaw himna turin kan sawi duh zawng leh kan tih duh zawngah te, keimahni vanga min thawhpui hreh an awm lohna turin kan danglam tur a ni,” a ti bawk.
Mizoram Chief Secretary lo ni tawh Lalnunmawia Chuaungo pawhin thusawiin, “State dangah hun rei tak hnathawkin kan awm a. State danga an thil tih ṭha Mizorama tih theih a awm vein ka hria a. Thil zawng zawng chu tih theih loh mahse, thil ṭha engemaw zat chu Mizoram tan a tih ve theih dawn niin ka hria a. Chuvangin, politics ah ka rawn zuang lut a ni. Mizorama ka lo chhuah hnua ka thil hmuh chhuah chu Gujarat aiin Mizoram ah Officer fel leh taima an tam zawk. Pu Lalsawta hova sorkarna kan siam hunah officer fel leh ṭha tam zia kan hmu dawn a ni,” a ti.
“Eng party ah pawh awm ila, CM tur hi tunge tih kan thlir a, kan zir chian angai tih sawiin kan CM ngaihdan a ram hi kal tur a nih avangin CM an pawimawh hle a. Mipuite pawhin sum leh paiah a rinawm em, dawtthu hmangin mipui bum a ching em, a thutiamah a ding em, tih thlir chunga vote thlak ṭhin turin Zoram mipuite ka ngenin ka sawm duh a ni,” a ti.
He hun hi MPCC Vice President Lal Thanzara’n a kaihruai a. Dr. Lalmalsawma Nghaka MPCC Treasurer in lawmthu a sawi a. MPCC Media Department Chairman Dr. Lallianchhunga’n Tang Puihna hrilhfiahna hun a hmang a. Lawmluhte atangin Pu Lalnunmawia Chuaungo, Pu Vanneihthanga Vanchhawng, Pu Eric F. Zomuanpuia, Pi Merium L. Hrangchal, Pi Lalnilawmi leh midang te’n thu an sawi bawk a ni.
