Aizawl, 20th June, 2023 : Vawiin thawhlehni khan Aizawl West III bialtu MLA VL Zaithanzama chuan tun hnaia HSSLC result chhuaka Mizoram pum huapa top 10 ni phak, a bial chhunga zirlai 4 hnenah lawmpuina Laptop a hlan.
Kum danga a tih thin angin VL Zaithanzama hian zirlai tithate chawimawina leh lawmpuina hun hi anmahni inah kalin a hlan thin a, kuminah hian Aizawl West III huamchhung Maubawk, Bungkawn leh Khatlaahte zirlai titha top 10 mi pali an awm a ni.
Aizawl West III bialtu MLA chuan, “Zirna tel lovin hlawhtlinna tluantling a neih theih loh a, ram siam that nan leh hnam humhalhna kawnga tha ber pakhat pawh zirna a ni. HSSLC leh HSLC te hi zirna kawnga kailawn hmasa a ni chauh a, a kawlpui khengthla ang hrim a kan chet chuan kan hlawhtling thei lo ang. Thawhrim a ngai a, hrisel a ngai bawk a, kan invawng tur a ni. Lehkhathiam tak tak tan hna a vang ngai lova, hna hmuh hi hlawhtlinna a la ni lo bawk. Eng ang takin nge hna kan thawh a, chu chu ram mipuiin eng tiangin nge an chhawr tangkai tih hi kan tehna tur a ni” tiin zirlai titha mi 4 te chu khawtlang mai ni lo, ram tan chhenfakawm la ni turin duhsakna a hlan.
Aizawl West III bialtu MLA VL Zaithanzama’n lawmpuina a hlante chu –
1. Lalawmpuii d/o Lalrinmawia, Maubawk (2nd position in Arts Subject)
2. Grace Lalrinpari Hauzel d/o Lalsangzela Hauzel, Khatla (5th position in Arts Subject)
3. Benjamin Lalsawmtlinga s/o Lalrinsanga Bungkawn (5th position in Arts Subject)
4. K. Vanruatpuia s/o K Lalremruata, Bungkawn (10th position in Arts Subject).
