“I ZPM viau emaw kan lo ti a, Congress zawm i tum ta mai si hi enge maw thil awmzia ni le?”..tih zawhna ka dawng hnem hle!
Kan sawrkar kalphung fel lo vanga ram leh mipui tawrhnate hi ka hmuin ka vei ve em em thin a. Induhsakna uchuakte, dan lo anga contract hna inpekte, mipui sum tam tak luanralna ni si, hna chhe lutuk te, smuggler-te zalenna ram kan ni ta maite ka hmuh hian lungawi harsa ka ti thin a, kan ram hmalam hun hi a thim em emin ka hre thin.
Ka phak ang tawkin RTI hmangin sawrkar deptt. hnathawh dan leh sum hman dante ka zawtin ka zirchiang ve thin a. Kan ram kalphung hi a bilhah a tho lo ni ber hian ka hmu fo thin. Hawina lam apiangah dik lo siamthat ngai hi hmuh tur a tam em em a ni.
Heng hi phak ang tawkin media hmangin ka doin ka au chhuak ve fo thin a, mipui rilruah sawrkar duhkhawp lohna a lian em em thin a ni.
Sawrkar lai thlak duhna Zoram mipui (neutral) thinlungah a lian em em a, a thlakna tur mipuiin an zawng a. Congress hi hman lawka kan lo hrawn tawh a ni a, Pu Sawta hova danglamna thlen an tum dan mipuiin an la hriatthiam pui phak si lo. La enchhin loh ZPM lamah mipui an thle ta dual mai a.
Sawrkar duhkhawp lohna leh dik lohna kan hailan apiangin ZPM lamah ‘thli’ kan beng na ting mai a. Tichuan ZPM chuan LMC an la fai vek a, Zemabawk LC an la fai leh ta vek a. Heti taka ZPM lama thli tleh tirtu zingah hian a thawh hlawk pawl tak pawh ka ni vein ka inhre thin.
(Chu thli tleh chu an dawngsawng thiam lo a, an kalphung thar pawh sawi hman lo lekin chhungkaw buaiin an buai zo ta a nih hi. Va belh ve tum chi pawh an ni lo. Kan tel lo pawhin an buai tawk em mai!..😄)
Mizoram sawrkar kalphung hi siamthat ngai a tam em em mai a, chumi veitu kan thian mithiam zawk ten “Reform Agenda” an lo siam chu kan han bihchiang ve ta a, rilrua kan lo vei em em thin chu, chiang leh fiah tak mai hian an lo ziak chhuak a. (He reforms agenda hi ZPM lama an hruaitute pawh hriattir an lo ni tawh a, an bengkhawn lo.) Mizoram tana Congress thar din tuma a ngaihtuahna zawng zawng seng mektu, Pu Sawta hnenah tlanpuiin chu reforms agenda chu kan pharh ho ta a. A thawhpuite nen min lo phurpui em em mai a. “Sawrkar tha siam hi alawm kan duh leh tum ber chu, heng ti hlawhtling tur hian theihtawp kan chhuah ho anga, rawn pen chhuak ula, a ti hlawhtlingtuah in tang tur a ni ang” an ti a. An manifesto-a telh turin kan rel ho ta a.
Mizote hi kawng dika hruai nuam hnam kan ni a, hnam tha leh thuawih thei tak kan ni. Heng ram siamthatna tur rawtna, reforms agenda te hi mipuiah kan hrilhfiah chuan, ram siamthat duhna-a tuihal mipuite zarah kan hlawhtling ngei ang tih kan beisei tlat a ni. He reforms policy hi a veitu leh hretu kan ni a, midangte tih hlawhtlin tura dah a, a lum china lo ai mai kha kan tihturah kan ngai thei bik lova, mipuite nen tangtlangin Pathian tanpuina a zarah kan ti hlawhtling thei ngei ang tih beisei chungin, mihring lamah insit leh huphurh tak chungin Pu Sawta kaihhruai Congress party-ah hian beiseina eng neiin kan rawn lut ta a ni.
Sawrkar kalphung nasa taka thlak danglamna tur, heng reform agenda, Mizoram Congress party agenda turte hi, vawiinah sawifiah vek sen a ni lovang. Kan sorkar kalphungah hian siamthat ngai, reform ngai a tam em em mai a, heng zinga pawimawh ka tih zual pathum, mimal tak pawha min ti phur zual em em thinte chu; Village Council Reforms Agenda, Cabinet Sub-Committee on Reforms leh Lokayukta thuam thatnate hi a ni a, tun tumah hian heng thil pathumte hi tawi fel deuha rawn sawifiah ka tum dawn a ni.
1. VILLAGE COUNCIL REFORMS AGENDA
Kan hriat theuh angin Village Council kan thlan dan hi party hminga chuh a ni thin a, rorel lai party tan chance a tha thin hle. Party VC kan thlan tlin thin avangin MNF VC lakah congress leh ZPM tan beisei tur a awm lova. Chutiang bawkin congress sawrkar laiin congress VC lakah an party mi nilo tan beisei tur a tam lo. Hleih nei taka mahni party mite vulh nan sorkar atanga hamthatna hrang hrang lo kalte hman thin a ni a, hei hian khawtlangah inthen hranna leh inthleibika thlenin, khawtlang inpumkhatna nasa takin a ti chhe thin a ni.
Pu Sawta hova sorkar thar hnuaiah chuan VC hi party anga chuh theih a ni tawh lovang. VC member ni turin party-a in affiliate a tel theih loh ang. VC election-ah party symbol hman theih a ni lo anga, Election Commission of India-in free symbol an pekchhuahte an duh duh an hmang thei ang. Kan VC thlanchhuahte chu party VC an ni tawh dawn lova, mipui huapzo VC an nih tawh dawn avangin an lakah tumah an inkiltawihin an inthlahrung tawh lovang. Chu chuan khawtlang inpumkhatna hun rei tak kan lo hloh tawh kha a siamtha leh dawn a ni.
VC THUNEIHNA SANG TAK PEK A NI ANG
VC te hi thuneihna sang tak pek an ni ang. An khawtlang tana hmasawnna hna thawhna tur sum sawrkar atanga lo kalte chu an kutah pek an ni ang. Village Development Committee (VDC) din a ni anga, VCP chair-na hnuaiah, VC memberte ex-officio member an ni ang. Khawtlang pa rawn leh Nu rawn te; YMA president, MHIP president, MUP president leh kohhran hruaitute thlengin he VDC-ah hian member atan ruat an ni ang. Chung mite chuan an khawchhung inkalpawhna kawng emaw, an feh kawng laih hnate thlengin an thawkin an enpuiin an vil zui thin dawn a ni.
VANTLANG INKHAWM A LAL BER ANG
Thlatin Vantlang Inkhawm koh thin a ni anga, Vantlang Inkhawmah hian chhungtin aiawh pakhat tel thin tur a ni ang. Khawtlang hmasawnna kawng hrang hranga VC/VDC te hmalaknate chu vantlang inkhawmah hian pharh thin a ni ang. Khawchunga insak tanpuina dawngtu etc thlengin thlir ho thin a ni anga, dawng awm tak dawng lo an awm em tihte, dawng awm lo tak dawng an awm em tihte thlengin Vantlang Inkhawm chuan a thlir thin ang. BPL ni lo BPL awm a rem tawh lovanga, NREGS sum thil danga lo pawh pen a rem tawh hek lovang. Contract hna hralh leh in leichhawn a rem tawh dawn lova, hmasawnna hnathawh tur ruahmante a nih dan turin a kal thei tawh dawn a ni.
MI THA AN RAWN PENCHHUAK ANG
Khawtinah Pathian tih mi, ram leh khawtlang tana ngaihtuahna tha tak tak neite an awm a, chung mi thate chu political party-a zuan luh kher a ngaih dawn loh avangin inthlahrung lovin khawtlang rawngbawlnaa inpe turin an rawn penchhuak ngam tawh ang. Hun reilote chhunga hmuhtheihin he that loh theih lohna bawm hian hmasawnna min thlen ngei ang tih kan beisei tlat a ni.
2. CABINET SUB COMMITTEE ON REFORMS
Tuna kan sawrkar kalphungah hi chuan, ministry a din phat atangin Minister te hian “Mahni seh seh mual hranah” an ti deuh mai a. Thawh hona tha a awm lova, hmasawnna a nih tur angin a kal thei lo fo. Sawrkar tharah chuan, CM chairman-na hnuaiah, ‘Cabinet Sub-Committee on Reforms’ din a ni anga, conveener/secretary bakah permanent member an awm ang. He Sub-Committee hian Minister hrang hrangte deptt chanah hmasawnna hnathawh mekte a thlir pui thin anga, project thenkhatah, department hrang hrang kawihhnawih awm thei thilah thawh hona tha a awm theih nan a changtu minister te leh secretary te koin an sawiho thin ang. Hna thawktu lak dante, hna kal lai mekah harsatna awmte a chinfel dan kawng dappuiin ruahmanna a siampui thin anga, an report hi cabinet meeting-ah pharh thin a ni ang. Dik lo taka hna inpek leh thawh a rem tawh lo ang.
LOKAYUKTA THUAM THAT
Central nawrna nasa tak avangin kum 2019 atang khan Mizoramah Lokayukta hi a hmingin a function ve tan a. An la tlabal em em a ni. Case chhui tur investingation wing takngial pawh tunah a la nei lova, sorkar hnuaia awm Anti Corruption Branch chu kutkeah a hmang ve thin. Lokayukta hi Independent Statutory Body a ni a, a tul chuan CM pawh chhui thei tura duan a ni. A thuneihna leh din a nihna anga hna thawk thei tura thuam that vat hi tih makmawh a ni a, Pu Lalsawta hova sorkar tharah Lokayukta thuamthatna hi ngaihpawimawh hmasak ber zingah telh tur a ni a, manifesto ah pawh ziah lan a ni.
Sawi tak ang khan kan sorkar kalphungah hian reform ngai a tam em em a, tun huna sawi kim sen a ni lo. Heng kan han tarlan maite atang pawh hian Pu Sawta sorkar hi a danglam dawn a, chumi ti thei tur erawh chuan mipuiin mawhphurhna kan nei ta a ni. A pawimawh ber chu heng reforms agenda ti hlawhtling thei tur hian Pu Sawta hoa sorkarna kan siam a ngai a. Chu chu Zoram mipuite koah a innghat ta a ni.
Ka lawm e!
