Indian Youth Congress (IYC) leh MPYCC ṭang kawpa hmalaknain June ni 19, 2023 khan Rahul Gandhi piancham pualin, Manipur buai avanga zohnahthlak thahnem tak relief camp-a awm mekte tanpuina hlan a ni.
Tanpuina hi Churachanpur chhunga relief camp atana hman pahnih Don Bosco Higher Sechondary School leh Churachandpur College-ah te hlan a ni a. IYC leh MPYCC Relief Team-te hian chhawmdawlna an ken tam zawk chu Manipur Pradesh Congress Committee hruaitute kutah hlanin, Manipur Pradesh Congress Committee hruaitute hian ruahmanna fel tak siamin relief camp hrang hrangah an sem darh ang.
MPYCC General Secretary HP Lalchuailova chuan, “Myanmar leh Bangladesh atangin raltlan engemawzat Mizorama an awm mek laiin, Manipur-a kan unau zohnahthlak ten kan duh loh leh mang lam pawha kan la man chhin ngai loh harsatna in tuar hi keini chuan kan tuilian thlir mai mai lo va. In chanchin ngaihthlak hrehawm tak takte hi kan thawnthu ngaihthlak mai mai lo a ni tih min hriatsak kan duh a ni,” a ti.
“Mi tam takin nunna kan chan tawh a, Biak In tam tak an hal chhe tawh bawk, chenna in tam tak hal chhiat a ni bawk a, he in tawrhna zawng zawng hi kan tawrhna a ni a. Mizoram lama rawn ral tlante leh Manipur relief camp-a awm mekte tan hian MPYCC President Pu Laltawnliana leh a thawhpuite chuan kan theih tawpin hma kan la chhunzawm zel dawn a ni,” a ti bawk.
Tun din hmunah hian Churachandpur huamchhung-ah relief camp 107 a awm mek a, mi sing 4 chuang relief camp hrang hrangah hian an khawsa mek. IYC leh MPYCC-te hian heng relief camp-a awm hmeichhia leh naupang kum tling lo te bakah nu hnute hne lai mekte tana tangkai tur thahnem tak leh damdawi chi hrang hrang engemawzat hlan an ni.
Manipur-a zohnahthlak relief camp-a awm mekte chhawmdawlna pe tur hian IYC Secretary Mizoram & Manipur In-charge Pi Sarifa Rehman bakah; MPYCC General Secretary HP Lalchuailova hovin MPYCC hruaitu engemawzat leh chanchinbu mite tirh an ni.
IYC leh MPYCC Relief Team te chuan Manipur-a cheng kan zohnahthlak unaute chawmdawl tura an kalna-ah kawng hrang hranga duhsak taka an lo dawng sawng leh hneh taka an lo mikhual chu lawmawm tiin, lawmthu kan sawi nghal a ni.
