Mizo National Youth Front (MNYF) bultumin vawiin chhun dar 1:00 khan Mizo Hnam Run a MNF Thalai Headquarters pisa ah MNF General Headquarters hnuaia frontal hrang hrang MNYF, Ex- Mizo National Army, Mizo National Senior Front leh Mizo National Women Front te chuan inkawmhona an nei, he hun hi MNF Thalai President Dr L.Thangmawia MLA chuan a kaihruai a ni.
MNF Thalai President Dr L.Thangmawia chuan, Lalna leh thuneihna hi Pathian ta a ni a, an sawi ang em em hian Chief Minister Zoramthanga hi diklo nise Pathianin a Chief Minister tir lovang. Tuna kan kaldan en hian term thara kan sorkar leh sorkar loh hi kan kutah a awm a ni. Party atanga malsawmna dawn tum ringawt hi a fuh lo, Mizo hnam tana kan bei anga, a malsawmna in min zui ang, a ti.
Dr L.Thangmawia chuan, ZPM chungchang sawi langin, “Mizo mipuite huaisen taka bumin ZPM hian kohhran hi kan party a ni tih leh, Unit din angai lo titute hian an tih loh tura an sawite hi an ti vek tawh a, party thenkhat candidate puan ruala buai tur an awm kan lo tih thin pawh a takin a rawn thleng ta mek a ni. ZPM hian candidate chang lo te tuamdam tur committee an din te hi party dangin an tih ngailoh a ni a, an party Treasurer in a awmna party show cause notice a pe te hi kalphung dangdai tak a ni a, kan beih ngai lovin ZPM te hi an mahni leh mahni an in bei tawk a ni, a ti.
Mizo National Senior Front (MNSF), Ex-Mizo National Army (Ex-MNA), Mizo National Woman Front (MNWF) leh Mizo National Youth Front (MNYF) hruaitute thukhawm chuan lungrual takin a hnuai a resolution te hi kan passed.
1. Chief Minister Pu Zoramthanga kaihhruai Mizoram sawrkarin sum harsatna namenlo kara ram hmasawnna leh himna tura hma a lakna hi lawmawm kan ti.
2. Kum 2023 Mizoram inthlanpui lo awm turah MNF in sawrkarna a chan leh ngei theihnan lungrual taka Pathian rawn chunga hmalak ho zel nise kan ti.
3. Myanmar, Bangladesh leh Manipur tualchhung buaina avanga sahimna zawnga kan unau Mizoram a rawn tlanlut te Mizoram sawrkar leh Zoram mipui ten kan lo tuamhlawm zel hi lawmawm kan ti a, kan unaute tana huaisen taka khawvel hriat a ding ngam Chief Minister Pu Zoramthanga kan chhuang tak zet a, Kan unaute buaina leh harsatna ah chhawmdawl zel turin a tawp thlengin kan ding reng dawn a ni.
4. UPSC Preliminary exam result chhuakah Mizoram atanga mi 12 inziaktling an awm hi lawmawm kan ti a. Thalaite hmasawnna tura kawng hrang hranga Mizoram sawrkar hmalakna hian rah duhawm tak a chhuahzel kan beisei a ni.
5. Ram tana kan rawngbawl pui Political Party dangte’n an chhungkua ah buaina nasa tak an tawh mek laia Pathian hruaina changa MNF in buaina tawk lova lungrual taka ke kan pen tlang zel hi lawmawm kan ti.
