Vawiin June 23, 2023 (Zirtawpni) hian ZPM Political Session Party Office-ah neih a ni a, he hun hi H. Vanlalhlua, Secretary-in a kaihruai a, JK Dawngzuala, General Secretary chuan thusawina hun a hmang.
He huna thusawitu JK Dawngzuala chuan, “Politics kan hmel hriat dan hi party hrang hrangte inkâp tawna an inbeihna te, dawt thu tlemte sawia kan chan a that dawn chuan pawi tih lohna te hi politics kan hmelhriat dan ni berin a lang a. Dawt var tih tawngkam te pawh kan hre ta fo mai. Chutih laiin politics hian hetiang politics hi min kawhhmuh a tum a ni ber lova; politics chu midang tana inpekna mai bakah ram leh mipuite chawikan hi a tum ber a ni tur a ni,” a ti. “ZPM te hi dik ngam turin kan inzirtir thin a, dawt sawi ai chuan na ngam zawk turin kan in fuih bawk a ni. Vawiina kan ramin harsatna a tawh mek lian tak pakhat chu chhungkhat laina induhsakna (nepotism) hi a ni a. Midang rawngbawlsaktu tur kan nih angin kan zavaia tha zawk kan ngaihtuah tur a ni,” a ti bawk.
JK Dawngzuala chuan, “ZPM chuan malsawm tlakin hna kan thawk tur a ni a, malsawma kan dawnte pawh min ti chapotu ni lovin mal min sawmtu Pathian hre reng chungin ram rawng kan bawl zawk tur a ni. Kalphung thar mipui sawrkar dik tak siam turin kan inbuatsaih tur a ni,” a ti a. “ZPM hi mipui ngaihzawn kan ni mek a, sawrkarna siam tur pawhin min beisei a ni. Chutih lai chuan Pathian huat zawnga kan awm chuan mipui bawk hian min hnawl leh dawn a ni. Sawrkarna hi party mal anga siam theih a ni lova, mipui siam a ni. Ram leh hnam dinchhuah leh tlukchhiatah pawh mipuiin mawh kan phur a, chuvangin kan hmalam hun a ram tha zawk siam tur pawhin vawiin a mite hi kan pawimawh ber a, kan tu leh fate tan Zoram tha zawk din turin kan rilru leh ngaihtuahna te seng tlang a kan chhia leh tha hriatna te fim taka hmang turin mi zawng zawng kan insawm nawn leh a ni,”a ti bawk.
He hunah hian Aizawl khaw pawn leh khawchung hmun hrang hrang report ngaihthlak niin Zoram hmun hrang hrangah ZPM-in hma a sawn zel dan leh hmalak zel dan tur te sawihona hun hman a ni bawk.
