“Mizoram Pradesh Youth Congress Committee (MPYCC) chuan Deputy Chief Minister Pu Tawnluia Department chan pakhat hnuaia cheng nuai 100 chuang hnathawhna awm loa ziah ral nia sawi awm chu, a rang thei ang bera chhui chian tura thubuai ziak lut turin Chief Minister Pu Zoramthanga leh Deputy Chief Minister Pu Tawnluia te kan phut a ni,” an ti.
Vawiin khan MPYCC president Laltawnliana chuan a chenna inah chanchinthar lakhawmtute kawmin, “Mizoram Legislative Assembly Speaker Pu Lalrinliana Sailo, USA Maryland-ah a zin \umin Zofa awmte nena an inkawm khawmnaah Mizoram chhunga thil thleng ngaihthah chi miah loh a sawi a nih kha.
“He thu tun thlenga kan ngawihpui nachhan hi chu Assembly Speaker meuhin eirukna a awm tih a sawichhuak a, a chian em avang leh Speaker meuhin a sawi chu thu tling a nih avangin rang takin kan sawrkar hian action a la ang a, thil tidik lotu chu a chhuichhuah vat kan rin avangin engmah kan sawi duh hrih lo va. Amaherawhchu, vawiin ni thlengin engmah hmalakna awma kan hriat loh avangin kan rawn tawng chhuak ve ta chauh a ni. Chiang taka eirukna awm nia langah pawh kan sawrkar hian hmalak a tum lo hi nâ kan ti a, hetiang thil chiang pawh a chhuichhuak ngam lo a nih chuan sawrkar zel tlakah kan ngai lo a ni.
“Pu Lalrinliana Sailo hian, Dy. Chief Minister Pu Tawnluia Department chan hnuaiah dik lo taka cheng nuai 100 chuang hnathawh awm lova ziah ral a awm tih a hriat thu Chief Minister Pu Zoramthanga leh Dy. Chief Minister Pu Tawnluia te thutdun lai ngei-a a hrilh thu leh an Department chan en uluk a tul thu a hrilh hial thu a sawina video ngei, mitin hmuh theiha Youtube-a tlangzarh a ni hi sorkar tan a mualpho thlak kan tiin pawi kan ti hle a ni.
“Mizoram Legislative Assembly Speaker Pu Lalrinliana Sailo, Maryland USA a zin tuma a thusawi Youtube-a tlangzarh-a nih hma pawh hian, Speaker Pu Lalrinliana Sailo hian kumin kum 2023 January ni 30 khan MNF Minister leh MLA zawng zawngte an inhmuhkhawm tumin, Chief Minister Pu Zoramthanga leh Dy. Chief Minister Pu Tawnluia te thutdun laiin Dy. CM Department hnuaiah cheng nuai 100 hmanna awm lova ziah bo a ni a, Dy.CM Department hnuaia thawk la naupang tak pakhat leh JE pakatin hrehawm ti taka an ziah ral thu a lo hrilh tawh tih Speaker hian a sawi bawk a. He thil thleng hi \ha a tih loh em avangin an Department chan chu en uluk tawh turin a hrilh hial niin a sawi bawk.
“Assembly Speaker meuhin Chief Minister awm lai ngeia Deputy Chief Minister khak a, a Department chana cheng nuai 100 chuang hmanna awm loa ziah ral a nih thu a hrilh bakah; an Department chan enkawl uluk tura a hrilh hial hnuah pawh MNF Sorkar Chief Minister Pu Zoramthanga kaihhruai hian ngaihven lovin eirukna hi a ngai pawimawh lo tih a ti langchiang hle a ni.
“Dy.CM Department chan pakhat hnuaia mipui sum cheng nuai 100 chuang lai hmanna awm loa ziah ral a ni hi kan ngai thutak hle a, Assembly Speaker meuhin he cheng nuai 100 chuang bo hi a ngaih thutak em em lai a, MNF Sorkar hian chhui zui leh thubuai ziah luh tumna tun thlenga a nei miah lo leh amah Speaker Pu Lalrinliana Sailo ngei pawh thil awm dan zawt chiang tura hma lak zuina an neih awm hriat tur a la awm miah lo hi; MPYCC chuan mak kan tih rualin, sorkar kaihruaitu Pu Zoramthanga kaihhruai dan nen a inhmeh tawk hleah kan ngai thung.
“He puanhnuai thil nia hriat hi a rang thei ang bera MNF sorkar hian chhui chiang tura hma a la lo a nih chuan, MPYCC ten kan thiam dan ang angin kan chhui zui dawn a.
“Chief Minister leh UD&PA changtu Dy. Chief Minister te, kumin January ni 30-a Assembly Speaker meuhin a lo hrilh hriat tawh, thla nga chuang a ral tawh hnuah pawh an la ngawih bopui zel theih avang hian Chief Minister leh Dy. Chief Minister te hi he sum ziah bo chungchangah hian a kaikuang ber an lo ni zawk em? tih hi kan zawhna a ni.
“Mipui sum cheng nuai 100 chuang hmanna awm loa ziah ral nia lang mêk hi; kan thiam dan ang angin kan chhui zui dawn nge, he eirukna tenawm tak hi a rang thei ang berin MNF sorkar hian an chhui zui dawn tih hi Chief Minister leh Deputy Chief Minister te hi Mizoram Pradesh Youth Congress Committee chuan kan zawt a, hun rei kan pek theih tawh loh tur thu kan hriattir bawk. Hei hi sorka mipui thlavang hauhna atana kan dinna a ni tih kan hriattir nghal a ni,” a ti.
