Mizoram State thenawm Manipur-a Meitei leh Tlangmite inkârah May 3, 2023 atanga buaina chhuak avânga Manipur State-in harsatna namên lo an tâwk hi Mizoram Presbyterian Kohhran chuan pawi a ti êm êm a. Mi tam takin nunna an chân te, Biak In, Kohhran Office leh Quarters te, mi mal in thahnem tak hål a nih avânga mi tam tak an våkvai te leh thlaphang taka an awm te hi Mizoram Presbyterian Kohhran chuan pawi a ti êm êm a ni. Chuvâng chuan –
1. Pawi sawi lo, nunau leh naupangte chena nunna läksak an ni hi Bible zirtirna kalh tlat a ni a. Hetianga rawng taka chête hi Mizoram Presbyterian Kohhran chuan a dem tak zet a ni.
2.India Danpui ‘Right to Freedom of Religion’ palzûta Kristianten Pathian an biakna hmun ‘BIAK IN’ hålsak, tihchhiatsak leh Kristiante thil serh bungrua chi hrang hrang tihchhiatsaka, hälsak an ni hi Mizoram Presbyterian Kohhran chuan pawi a tiin, hetianga titute hi a dem tak meuh a ni.
3. He buaina avanga nunna chân te, in leh lo bungrua leh chhûngkaw ro chan zawng zawng te, lu nghahna pawh nei lova vâkvai te hi Mizoram Presbyterian Kohhran chuan a lainat êm êm a, a tuarpui tak zet a ni.
Manipur State-ah remna leh muanna a awma, nunphung pangngaia an khawsak leha, zalên taka Pathian an biak leh thuai hi kan duhsak tak meuh a, chutiang a thlen theih nân chak taka hma la tûrin Manipur State Sawrkâr hruaitute leh Central Sawrkår hruaitute kan phûtin kan ngên tak meuh a ni.
5. Manipur State buaina avânga harsatna tawk leh tuartu zawng zawngte tân Mizorama Kohhrante kan tawngtai a, tawngtai zêl torin kan inbeisei a ni. Mizoram Kohhran Hruaitute Committee-in July ni 8/9, 2023-a Manipur buaina chungchanga tawngtai rual a rawt hi zawmin Mizoram Presbyterian Kohhran chuan ni 9.7.2023 Pathianni zán inkhawmah mahni Kohhran theuhah tawngtai rualna hun hmang turin kan inngen e.
TAWNGTAI RUAL THUPUI
1. Manipur-a chi leh chi inkâra buaina chhuak a lo reha, remna leh muanna a awm theih nän.
2.He buaina avânga nunna, in leh lo chân zawng zawngten Pathian awmpuina leh thlamuanna an chan theih nån.
3. Zah lo taka sakhaw hmun thianghlim leh Pathian biakna thil serh pawimawh tihbawrhbån hi a thlen nawn tawh loh nån.
4. Uniform Civil Code: India ram puma Uniform Civil Code (UCC) hman tuma hma lák mêk hi hnam inpumkhatna tichhe thei leh sakhaw zuitu nei tlêm zawk leh hnam tlêm zâwkte tân a him dawn loh avângin UCC hi kan ramah hman a nih loh nån.
