Mizo Zirlai Pawl (MZP) General Headquarters, Aizawl chuan tunhnaia National Institute of Technology (NIT), Mizoram thawktu lak chungchangah thil fel lo awm nia a hriat avangin ngun takin a chhui a. NIT hnalak kalphungah NIT awmna State mi leh sa, tling leh tlak duhsak tura tarlan a nih ang zawm lova, ram neitute nekchep zawng leh hlamchhiah zawnga hmalakna a awm ngei tih hriat a nih avangin MZP chuan hma a la a.
MZP chuan, he thil thleng hi tha a ti lo hle a. Hemi chungchangah hian NIT, Mizoram Director chu a office ah hmuin NIT kalphung anga hna ruak hnawhkhat tura hrilh a ni a. MZP hmalakna avang hian NIT, Mizoram thuneitute chuan Mizo thalai tling leh tlak a la ta a. MZP hmalakna anga NIT Mizoram-ah hnaruak hnawhkhah a nih hi MZP chuan lawmawm a ti hle a. Hun kal zel turah NIT kalphung anga hna diltute enhrang lova dik taka la thin turin NIT Mizoram thuneitute a ngen a ni.
Tin, tun hnaia Mizoram Assembly hnuaia thawktu lak chungchangah duhsak bik avanga thawktute vua leh vang lak an awm tih thawm awm chu MZP in a hriatin hma la in a chhui mek a, RTI hmangin document hrang hrangte dil mek a ni a. Thil dik lo leh fel lo a awm a nih chuan, Mizo thalaite’n an dikna chanvo an hmuh ngei theih nan MZP chuan hma a la dawn a ni.
MZP chuan Mizoram chhunga Central leh State hnalak hrang hrangah ram leh lungfa tling leh tlak ten an dikna chanvo an hmuh ngei theih nan hma ala zel dawn a ni.
