Joint Hnampual Zirlai Pawl chuan thuchhuah siamin, “Manipur buaina chungchanga kan unau zofate tawrhna zozai hi Joint Hnampual Zirlai Pawl chuan pawi a ti takzet a. Kan unaute nunna tamtak lak a ni leh, khua te in hal sak a, Khawvel Indopui lai pawha thleng ngai lo, naupang leh hmeichhe awmnem te hial zuah an ni ta lo hi kan rilru a na takzet a, Meitei ho chet dan hi kan dem hle a ni.
“He buaina hi ruahman lawk (pre-planned) dik taka thil tih a ni tih hi kan pawm a. Zofate rawt chimit (ethnic cleansing) tumna dik tak ah kan ngai. Hei mai bakah Kristian te Biak In thianghlim tamtak min hâl sak hi Kristian te nuaibo tumna propaganda-ah kan ngai.
“Ni 02-07-23 a kan unaupa David Thick a nung chunga man a nih hnu ah rawng taka a lu tan sakin, a lu chu ramsa ang maia nghaisa a an târ hnuah, a taksa zawng zawng an hål ral hi a rapthlakin a nunrawn thlak kan ti hle. Meitei ho chetdan hi kan dem takzet a ni. Kan unau zofate tawrhna zozaite hi enliam harsa kan ti tawh hle a, Mizoram Sawrkar pawh kan unaute buaina ah hian thuk zawka inrawlh turin leh chak leh zual a, a taka hma la turin kan ngenin kan phût tlat a ni.
“Manipur, India ram chhunga mi ngei a kan mup mup lai leh nunna tamtak lak a nih hnu, he buaina hian ni 60 lai a ral tawh hnu pawh a India Prime Minister Narendra Modi a ngawi reng hi hriatthiam har kan ti hle. Northeast India hi India rambungah min ngai ta lo em ni tih hi kan zawhna a ni. Manipur buaina chungchangah hian Manipur Sawrkarin Law and Order a kenkawh kawngah a hlawhchham let der tih chiang takin a lang tawh a. India danpui hnuaiah pawh Minority te kan him tawh lo ah kan ngai a, a ranglama President’s Rule-a dah turin Central Sawrkar kan phút tlat a ni.
“Meitei, Mizorama awm ten vawiinni thlenga harsatna engmah tâwk lovin thlamuang taka awmin, zalên taka an awm laia, kan unaute nitin a an thi zawih zawih reng mai hi hriatthiam har kan ti tawh hle a. Mizoram a Meitei awm ho in a rang lama inremna leh muanna a awm theih nan thuchhuah nei ve turin leh hma la turin kan hriattir bawk a ni.
“Joint Hnampual Zirlai Pawl chuan kan unau Manipur-a zofate tawrhna leh dinhmun a enzui reng dawn a, a tul dan a zirin hma a la dawn a ni,” tiin an tarlang.
