Mizo National Youth Front (MNYF) Headquarters, Extended meeting-in a lo rel tawh angin vawiin July ni 4, 2023 (Thawhlehni) hian MNYF Headquarters chuan Manipur aṭanga Mizorama râltlante ṭanpuina a semchhuak.
MNF Ṭhalai Headquarters-in Manipur râltlante ṭanpuina a sem chhuah thawhkhatna ah hian Tuirial Airfield vênga râltlante khawsakna hmun tlawh a ni a, he lai hmunah hian raltlan mi 115 bawr awm in, naupang 60 vel an awm bawk a ni.
Manipur râltlante puala ṭanpuina sem inkhawm tawi hmanna ah hian MNYF Vice President Zodinpuia chuan, Manipur hian ralthuam aia a mamawh hmasak chu remna a ni, a ti a. Remna leh muanna a awm theihna tura sawrkar laipui hmalâkna leh Manipur sawrkar chet dàn erawh chu an duh khawp lo hle tih sawiin, nunau mangang inhumhimna zawnga Mizoram rawn belte riltâma an awm loh nan Mizoram sawrkar, tlawmngai pawl leh kohhran te’n theihtawp an chhuah zel thu a sawi a.
Zodinpuia chuan, Manipur-a Zohnahthlâk kan unaute kiang ah MNF a din reng thu sawiin, Mizoram Sawrkar-in râltlan te puala Central lama grant a dil te pawh engmah la hmu lo mah se Mizorama an awm chhung chu an nghei loh tur thu a sawi a. Khawvel hriat ah hnam anga kan dam khawchhuah theih nan tuna harsatna kan tawh hian lungrualna tlângah Zofate min hruaikhawm se tih chu Mizo mipuite beisei leh duhthusam a ni, a ti a. Manipur tualchhung buaina avanga kan unaute rum ri chuan Zofate rorelna pakhat hnuaia kan awm hun tur min nghahhleh zualtir hle a ni, a ti bawk.
Vawiina MNYF Headquarters-in Tuirial Airfield venga râltlante chenna hmun an tlawhna ah hian MNYF Treasurer H.Lalroliana chuan râltlante ei tur buhfai leh ei tur dang chi hrang hrang ṭhahnem tak a hlan a ni.
