Uniform Civil Code (UCC) chungchangah vawiin chawhma dar 11:00. khan Ronald Sapa Tlau, Chief Spokesman & Ex MP, MPCC chuan chanchinthar lakhawmtute kawmin, “BJP Party in engemaw chen an lo tum tawh, Uniform Civil Code (UCC) chu India ram puma hman a nih thuai theih nan Parliament Session leha putluh tum anih thu kar 1 liam ta khan PM Modi chuan Bhopal-ah alo puang ta a. Hei hi India mipui tam zawk tana thu lawmawm anih theih laiin, Hnam tenau leh Sakhaw te zawk tam tak tan thu thinthawng a ni thung a. Keini Mizo hnam Kristian sakhaw betu tan ngei pawh kan hnam nun (culture), sakhua leh nitin nun min thiat saktu leh kan hnam ziarang bo thak khawpa min nghawng tur anih vangin Mizo Kristiante rumin min siam ta a ni.
“India Constitution hian mimal zalenna chungchang hi chiang takin a tarlang a. A duang chhuaktu, Ambedkar chuan, ‘Mi tumahin an thu neihna hmangin mi dang an nek emaw, nawr tur emaw a ni lo,’ tiin a sawichhuak a. Chuvangin kan ramin Ram Dan alo duan chhuah chu Christian te tan leh Tribal leh hnam tenau dangte tan emaw, tu tan mah a hnawksak tur a ni lo”, a tih hi India zalenna sual chhuaktu Congress Party ngaihdan ram din tirh atanga vawin thlenga nghet taka a vawn tlat chu a ni.
” Ngaihdan Hlauhawm: Article 371G hi Mizoram tan Special Provision a nih avangin, mi thenkhatin, ‘Parliament in UCC hi pass mah se, Mizoram Legislative Assembly in a pawm ve kher loh chuan Mizoramah hman theih a ni lo ang’, tia kan zinga sawi an awm mek a. Mahse, thudik tluantling zawk chu, UCC dan hi BJP hoin Parliament ah an pass vaih chuan ‘Kashmir Special Status’ tia an chhuan em em pawh kum 2019 a BJP Sawrkarin Kashmir State a thiah rual rualin an Special Status kha a bo nghal dan kan hmuh tawh atang khan, Zofate sakhua leh hnam nih phung humhim tur chuan Mizo mipuite himna awmchhun, UCC Parliament a pass an tum hi mipui nawlpuiin thothil ang thapa a tawp thlenga kan lo do zel hi tihmakmawh ani ta.
” UCC hi Kristian-te tan leh Northeast Tribal te tan a hlauhawmzia hrechiangtu, Nagaland ah leh Sikkim-ahte chuan do turin JAC te chuan hma an la mup mup tawh tih kan hmu thei a.
“UCC hi India ram inpumkhatna tichhe theitu tur leh hnam tenau leh sakhaw te zawkte rahbehna leh inchimralna hmanraw hlauhawm tak anih dawn avangin a tawp thlenga dodal tlat a ngai tih Congress Party ngaihdan nghet a ni a. Hemi chungchang India mipuiin an ngaihdan Law Commission-a thlen theih hun (june ni 14 atanga July ni 30) chhung ngeia Law Commission-ah thlen tura MKHC in thahnem ngai taka Party tinte a ngen ang ngeiin Congress Party President Pu Lalsawta chuan a remchan veleh kan Party Doldalna thu a thlen dawn a ni.
“Sakhaw tenaute, hnam hnuaihnung leh tlem zawkte chuan Central BJP Sorkarna hnuaiah hian enhranna, dodalna leh tihduhdahna kan tawng ta fo mai a. Tin, kan missionary-te tawrhna thlentu, kan biakin min hal saktu leh ringtu tam tak tihduhdaha that mektu an ni tih khawvelin min hriatpui bawk a. Tuna kan ram neihchhun, Mizoram chhunga kan zalenna leh hnam leh sakhaw nunphung tihbuai loha a awm zel theih nan Mizoram Kohhran hote, Party hranghrangte leh NGO te pawh lo penchhuaka, BJP leh an sangawizawnpuite lian zel tur leh UCC Parliament a Pass an tum mek chu khauh tak leh lungrual taka lo dodal puiah Congress Party chuan mi zawng zawng kan sawm a ni,” a ti.
