Aizawl, July 5, 2023 (Nilaini): Vawiin chawhna dar 10:00 khan Dr. Vanlalthlana, MLA (Aizawl North II) leh C. Lalchhandami Corporator (AMC Ward III) te chuan Government Aizawl North College (GANC), Ramhlun North ami Skyridge Construction & Consultancy Services-in an sak mek chu an tlawh a. MLA leh Corporator te hi ZPM Aizawl North II Block hruaitu ten an tawiawm a ni.
Aizawl North College building extension hi RUSA hnuaiah Rs.150 lakh senga sak zawh tura ruahman niin, hna hi October 2019-ah thawh tan a ni a, November 2022-a thawh zawh tura ruahman a ni. Skyridge Construction & Consultancy Services te hian RUSA hnuaiah Rs.21,37,00,000/- work order hmuin Mizoram college hrang hrang sak hna an thawk mek a. Dr. Vanlalthlana leh Pi C. Lalchhandami te hian GANC sak a nih danah hian thil fel tawk lo awma hriain an lungawi lo hle a. Building extension sak chhunzawm a nih danah hian duhthusam tawk lohna lai tam tak a awmin an hmu bawk.
Hna a nihna tur anga thawh a ni lo leh thawh zawh hun chhung tura ruahman anga thawh zawh a ni lo chu an ngaihmawh bakah, hna an thawh muan avanga zirlaite tana class kal theih loh phah hialna a thleng ta hi pawi an ti hle a. Tuna hna la thawh zawh lohte pawh hi a rang thei ang bera thawk zo va, zirlaite hmalam hun thui tak an kutah a awm a ni tih inhria a, zirna in tha leh zahawm tak siam turin hnathawktute pawh an chah nghal a ni.
