Central Young Lai Assn. (CYLA) chuan thuchhuah siamin, “Tunhnaiah Bangladesh ramchhung a ralmuanloh avangin kan Bawm unau tam tak kan ram chhungah rawn raltlanin an awm a CYLA chuan raltlante hi kan theihna sang berin duat leh hmangaih takin a lo dawngsawng reng a ni.
“Chutihrualin raltlan tam tak zingah ralthuam keng pawlte rawn in zepin kan ram leh hnam himna leh muanna tichhe thei zawnga khawsain ralthuam tawlh leh chelek inzirtirna te awmin Dt 26.06.2023 ah Chamdur ‘P’ ram chhungah Improvised Explosive Device (IED) test a ni tih hriat a ni a. CYLA chuan hei hi thalo a tiin a duh lo em em a. Raltlan leh tualchhung mi hrim hrim ralthuam leh ruihhlo kaihhnawih ah inhnamhnawihlo turin a hriattir a, inhnamhnawih lui te hriatchhuah an nih chuan kan ram leh hnam, mipui him nan dan angin an chungah hmalak a ni ang. Sub Headquarters, Group, Joint leh Branch YLA zawng zawngte pawh in kan area theuh uluk taka vil tur leh enzui tura ngen leh hriattir kan ni.
“Tin, raltlante zingah therhlo uma pawl danga inlet tura sawmna leh vauna a awm tih hriat a ni bawka. Hetiang kawngah hian Lairam chhunga NGO dangte pawh in chingzui tawhlo tur leh sim nghal turin kan in hriattir nghal bawk a ni,” tiin an tarlang.
