Mizo National Youth Front (MNYF), Headquarters chuan vawiin July ni 6, 2023 (Ningani) hian MNF thalai Headquarters hruaitute pualin Political training, Falkawn a Mayflower park ah a buatsaih a, he hunah hian Vanlalzawma Vice President, K.Vanlalauva Treasurer leh Lalchhandama Ralte Adviser, MNF Gen.Hqrs ten thalaite fuihna leh thu pawimawh hrang hrang an sawi a ni.
He hun a thusawitu hmasa MNF Vice President Vanlalzawma chuan, Mizoram politics virvel han thlir hian MNF hian sawrkarna a chang leh ngei dawn tih a lang chiang chhozel a, Mizoram hmuntin mai a MNF hmasawnna hi a lawmawm takzet a ni. MNF hi Mizo thalaite ta leh thalaite din a ni a, Mizoram in inthlanpui kan hmachhawn turah pawh thalaite avangin hnehna chan ngei kan inbeisei a ni, a ti.
MNF Treasurer K.Vanlalauva pawhin thu sawiin, Mizo Nationalism vawng nung theitu chu thalaite in ni a, hnam innghahna in ni. Hruaitute hi kan thutiam ah kan din nghet tur a ni a, kan sawiloh anga kal hi politics ah a pawi em em a, hei hi vawiin thlenga mipuiin ZPM Leader Pu Lalduhoma laka rinna an nghhah theihlohna chan pawh niin ka hria, a ti.
Lalchhandama Ralte MNF Adviser pawhin MNF thalai kalkhawmte fuihna thu sawiin, “kan awmna party hi engtia din nge a nih kan hriat a pawimawh, a ti a. MNF chu Mizo hnam tana din a ni a, Zofate rorelna pakhat hnuaia kan awm theihna tur atana din a ni. MNF hi party zawng zawngah hruaitu neitha ber kan ni a, kan hruaitute hian MNF an zawm atangin party dangah vawikhat mah an la pakai ngailo. Hei vang hian principles nghet nei a ni a, Pathian min pek ram humhim tura min pek a nih avangin MNF hi a hlu bik hle, a ti a ni.
Vawiin a MNF thalaite political training neihna inkhawm kaihruaitu MNYF Vice President Zodinpuia chuan, Assembly secretariat chhung a hnalakdan chungchang ah eptu party pakhat ZPM ten thu awmzia hrelo leh rem leh remlo a MNF leh Mizoram sawrkar an rawn kawk nghal ngawt mai chu sawrkar kalphung an hriatloh zia an rawn inpuanna mai a ni, a ti a. Assembly secretariat-a hnalakdan hi India Danpui Article 187 in a sawi ang in; Assembly secretariat hian a hnuaia thawktu lakdan leh service chungchang ah thuneihna tawp an nei a, Mizoram Assembly secretariat hnuaia thawktu lakdan ah hian MNF sawrkar in inrawlhna leh mawhphurhna a neilo a ni, a ti.
Zodinpuia chuan Chief Minister Pu Zoramthanga kaihhruai MNF sawrkar hian Mizo thalaite hmasawnna turin nasa takin ke a pen a, MNF sawrkar hnuaia MPSC leh MSSSC in hnalakna tam tak a kalpui tawhna ah sawisel tur a awm ngailo, a ti bawk.
