Mizoram Police leh Assam Rifles ten Mizoram kaltlang tura dan lova Ramsa leh Sava an man, Aizawl Zoologycal Park (Sahuan)-a an dah luh tawhte chu a bo then nia sawi a ni a. Hemi chungchangah hian Mizoram Birds Lovers mai bakah Sahuan enkawltute pawhin buaipuiin, FIR te pawh thehlut an awm tawh nia sawi a ni a. DND chuan, “Thuchiang hriat tur a awm vat ang,” tiin thu a dawng.
Kar liamta Zirtawpni (7/7/23) khan Seling daia Central YMA Anti Drugs Squad duty te chuan ramsa tam tham tak tawlh luh tum an man a. Hemi tum hian khawvel pawhin a ngaihhlut em em Lear’s Macaw (Vaki lian chi) international black market rate ah pawh US Dollar 1,00,000 (as in 2008) man lai mai an man tel a. Heng sava leh ramsa an man te hi an man tuk Inrinni ah Sahuan ah dah luh an ni a. An dah atanga a ni hnihna (Monday 10/7/23) zan ah Lear’s Macaw te hi Sahuan atangin a bo leh nia sawi a ni leh bawk a. Sahuana an dah tawh bote hi a man to chi zel an ni a, a man tlawm erawh tun thlengin an la awm niin kan thudawnna chuan an sawi bawk.
Mizoram Birds Lovers te chuan, “Kum 2018 chho vel atang khan dan lova ramsa leh sava tawlh kalkawng atan Mizoram hi hman chhoh kan ni tan zeuh zeuh a. Hun a lo kal zel a illegal wildlife trafficking hian kan ramah hian thuk takin kua a lo hreuh zau ta zel a. Mizoram Police te Assam Rifles lam leh tlawmngai pawl hrang hrang duty te hian damdawi piah lamah heng dan lova ramsa/sava tawlh te hi an man chho ta fo mai a. Heng ramsa/sava an man te hi Aizawl Sahuan ah dah luh thin an ni. Heng an ramsa/sava an man te hi thenkhat chu man to tak tak leh khawvel atang pawh a mang mai hlauhawm tawh (endangered species) te an ni a. Forest department lam hian mipui hmuh theih turin an pho chhuak ve bawk a. Amaherawhchu, kum 2021 khan Vaki lian chi leh man to tak mai man a ni a. Aizawl Sahuan ah dah luh niin, an dah atanga kar reilote ah ruk chhuah ngei nia hriat a ni a. Tun thlengin a awm na chin hriat a ni tawh lo a. A bo zan hian CCTV an dah chu a chhia niin sawi a ni,” an ti bawk.
