Vawiin khan Mizoram Gorkha Youth Association (Central) huaihawtin Gorkha ho zinga thu leh hla lama puipa bera an ngaih Adikavi Bhanubhakta Acharya champhaphak vawi 209-na ‘Bhanu Jayanti’ chu urhsun takin Vanapa Hall-ah an hmang. He Ni lawmna hi Kolasib leh hmun dangah te pawh MGYA Branch ten an buatsaih a ni.
‘Bhanu Jayanti’ lawmna pui ber Aizawl Vanapa Hall-a neiha MGYA hruaitu lo ni tawh thin Pu Sher Singh Thapa chu khuallin a ni a, he hunah ah Adikavi Bhanubhakta Acharya thuziak hrang hrang te chhiarchhuah a ni a. Gorkha hnam lam chi hrang hrang te entir a nih bakah an zirlai tithate chawimawina hun hman a ni.
He Ni pualin kar hmasa Nepali Middle School Khatla-ah Adikavi Bhanubhakta Acharya Thu leh Hla phuah te bakah thu leh hla lama tuimi ten an thuziak chhiarchhuahna hun leh thangthar ten Gorkha Hnam ziarang leh an pipu te an hnutchhiah Thu leh Hla lama an hausakna te puanzarna, chawimawina leh Kavi Gosthi(Seminar) te neih a ni. Zirlai naupang te tan Essay Writing, Sketching leh Quiz intihsiakna te buatsaih a ni bawk.
Adikavi Bhanubhakta Acharya hi Nepal rama Tanahu District-a Chundi Ramgha khuaah kum 1814 khan a piang a. Puithiam chhungkua an nih avangin a hranpain sikul kal lo mahse a pa zirtirna avangin ziak leh chhiar lamah a thleng sang hle a. Thu leh Hla lamah hnutchhiah tam tak nei mahse khawvelin a hriat larna chhan ber chu Hindu Sakhaw Lehkhabu Thianghlim, ‘Ramayana’ Sanskrit tawng harsa tak atanga Nepali Tawng-a a lehlin avangin a ni. Amah hi Gorkha hnahthlak hnam hrang hrang te inkara inpumkhatna siamtu ah a ngaih a ni a. Thu leh Hla lama Nepali tawng a hriatlar hmasakber a nih avangin,a hming bulah pawh Adikavi tih ngat a ni a, kum 1868 khan a boral a ni.
MGYA hi Mizoram-a Gorkha-te pawl lian ber niin 1976 khan din a ni a. MGYA hian Aizawl khawpui chhungah Branch 12 leh Aizawl pawn lamah Sub-Headquarter 1 (Kolasib) leh Branch 5 an nei a, member 4500 vel an awm mek a ni.
